Սահմանադրական փոփոխությունների հանրաքվեի արդյունքները անվավեր ճանաչելու պահանջով Ազատության հրապարակում նստացույց անող «Նոր Հայաստան» հանրային փրկության ճակատի համակիրների եւ ոստիկանների միջեւ այսօր՝ դեկտեմբերի 28-ին, քաշքշուկ է տեղի ունեցել, որի արդյունքում մի տարեց տղամարդ տուժել է: Այս մասին NEWS.am-ի հետ զրույցում ասաց «Ոտքի Հայաստանի» անդամ, նստացույցի մասնակից Գագիկ Եղիազարյանը:
Գագիկ Եղիազարյանը պարզաբանեց, որ դեկտեմբերի 27-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնի աշխատակիցները խնդրել են 4 ժամով շենքից իջեցնել «Նոր Հայաստան» գրությամբ պաստառը, նստացույցի մասնակիցները համաձայնել են, սակայն, այսօր պաստառը հետ փակցնելիս ոստիկանությունը թույլ չի տվել, ինչից էլ ոստիկանների եւ նստացույցի մասնակիցների միջեւ քաշքշուկ է սկսել:
«Նստացույցի մասնակիցները 3-4 հոգի են եղել, ոստիկանները մեծաթիվ, քաշքել, հարվածել են մերոնց, երբ նրանք պաստառն են փակցրել, թույլ չեն տվել: Պարգեւ պապի ինքնազգացողությունն է վատացել, վզի շրջանում վնասվածք էր ստացել, բուժօգնություն ցույց տվեցի, հիմա գնացել է տուն»,-պատմեց նստացույցի մասնակիցը:
Գագիկ Եղիազարյանի խոսքով՝ երբ իրենք փորձել են հարցը պարզաբանել օպերայի և բալետի ազգային ակադեմիական թատրոնի աշխատակիցների հետ, վերջինները հայտարարել են, թե իրենք ոչ թե խնդրել են ժամանակավորապես հեռացնել պաստառը, այլ ընդմիշտ՝ պատճառաբանելով, թե շենքը պատմամշակութային հուշարձան է:
«Այսքան ժամանակ այդ պաստառը կախված է եղել, եւ դա ոչ մի վնաս չի հասցրել պատմամշակութային շենքին, մենք նույնիսկ մի մեխ անգամ չենք խփել, այն փակցրել ենք հին մեծ պաստառների վրա»,-ասաց Գագիկ Եղիազարյանը:
Ոստիկանությունից NEWS.am-ին տեղեկացրին, որ Ոստիկանության կենտրոնականի բաժնում նյութեր են պատրաստվում դեպքի հանգամանքները պարզելու համար:
