Եվրոպայի Խորհրդի խորհրդարանական վեհաժողովի (ԵԽԽՎ) բանաձեւերն այսօրվա աշխարհում ոչ մի նշանակություն չունեն: Այս մասին, այսօր՝ հունվարի 22-ին, լրագրողների հետ հանդիպման ժամանակ նշել է «Նորավանք» գիտակրթական հիմնադրամի ղեկավար Գագիկ Հարությունյանը՝ մեկնաբանելով ԵԽԽՎ առաջիկա նստաշրջանում հակահայկական երկու բանաձեւերի ընդունման հնարավորությունը:
Նրա խոսքով, ԵԽԽՎ առաքելությունը հավասարակշռված մոտեցում ցուցաբերելն է: Բայց, քաղաքագետի համոզմամբ, զգալիորեն նվազել է այդ կազմակերպության կշիռը, եւ եվրոպական բյուրոկրատիան այսօր գտնվում է խորը ճգնաժամի մեջ:
Անդրադառնալով հարցին, թե այդ բանաձեւերի ընդունումը ինչպես կարող է ազդել ԼՂ հակամարտության գոտում իրավիճակի վրա, Հարությունյանն ընդգծել է. «Սահմանին լարվածության մեծացումը բացարձակապես կապված չէ այդ բանաձեւերի հետ: Ադրբեջանն իրեն ավելի համեստ կպահի, քանի որ էապես փոխվել են Ռուսաստանի եւ Թուրքիայի հարաբերությունները: Դա, իր հերթին, փոխում է Ռուսաստանի վերաբերմունքը Ադրբեջանի նկատմամբ»:
Հարությունյանի խոսքով, ակնհայտ է, որ այսօր Ադրբեջանի առարկությունները Ռուսաստանի կողմից ընկալվում են որպես երրորդ ճակատի բացում, եւ որեւէ գործողության դեպքում՝ ադրբեջանցիները կարող են բավական խիստ պատասխան ստանալ:
Նշենք, որ Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի օրակարգում ներառված են Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» ու Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» զեկույցների հիման վրա պատրաստված երկու բանաձեւերի նախագծերը: