Լոռիում հունվարի 24-ին տեղացած առատ ձյան պատճառով բազմաթիվ դժվարություններ են առաջացել: NEWS.am-ի թղթակիցը հաղորդում է, որ ժամը 17-ի սահմաններում Վանաձոր քաղաքի Պարույր Սեւակի փողոցի վրա շղթայական ավտովթար է տեղի ունեցել «ՎԱԶ-2107», «Շեւրոլետ» եւ շտապօգնության ծառայության «Ֆորդ» մակնիշի ավտոմեքենաների միջեւ, որի հետեւանքով մեկ մարդ մարմնական վնասվածքներով տեղափոխվել է Վանաձորի բժշկական կենտրոն:

Շուրջ մեկ տասնյակից ավելի վթարներ էլ արձանագրվել են մարզի տարբեր քաղաքներում:

Արդեն ժամը 20.00-ից հետո ճանապարհներն ամբողջովին պատվել են մերկասառույցով, ինչի հետեւանքով Ճանապարհային ոստիկանության Լոռու մարզային վարչությունը որոշում է կայացրել արգելել բեռնատար մեքենաների ընթացքը դեպի Վանաձոր-Ալավերդի եւ Սպիտակ-Երեւան ուղղություններով:

Ողջ գիշեր նշված մեքենաների վարորդները ստիպված են եղել մնալ մեքենաներում: Մինչ այս պահը մարզի բոլոր միջպետական եւ հանրապետական ավտոճանապարհներին առկա է մերկասառույց: Ճանապարհները դժվարանցանելի են:

Լուսանկարները՝ Ալեն Գրիգորյանի