«Նոր Հայաստան» նախաձեռնությունը միասնական դաշինքով 2017-ի խորհրդարանական ընտրություններին մասնակցելու օրակարգ չունի, հետեւաբար չի կարող քննարկել ՀԱԿ խմբակցության պատգամավոր, «Ազատություն» կուսակցության նախագահ Հրանտ Բագրատյանի առաջարկը։ Այս մասին NEWS.am-ի հետ զրույցում նշել է «Նոր Հայաստանի» ներկայացուցիչ Վարուժան Ավետիսյանը։
«Իսկ մեր օրակարգում կա՞ն ընտրությունները։ Կեղծարարական մեքենայի պարագայում ինչպես պիտի հաղթել։ Եթե գողերը եւ ընտրություն են կազմակերպում, եւ ձայներ հաշվարկում, եւ արդյունքները որոշում, ի՞նչ միասնական դաշինքի մասին է խոսքը»,-նկատեց նա:
Վարուժան Ավետիսյանը դժվարացավ ասել՝ ինչպես կվարվեն, եթե իրենց ճակատին միացած ուժերը ընդունեն Հրանտ Բագրատյանի առաջարկը։
«Մենք դեռ չենք քննարկել այդ հարցը, չեմ կարող վերաբերմունք արտահայտել։ Ընտրությունների համակարգը վերածվել է ժողովրդի իշխանության յուրացման ու վարչախմբի վերարտադրության գործիքի։ Ինչքան էլ փորձեն դրա մեջ աշխատել, արդյունքը նույնն է, քանի՞ անգամ պիտի փորձես»,-ընդգծել է Ավետիսյանը:
Հիշեցնենք, որ «Ազատություն» կուսակցության նախագահ Հրանտ Բագրատյանն առաջարկել է բոլոր ընդդիմադիր ուժերին միավորվել խորհրդարանական ընտրությունների ժամանակ եւ հաղթել: «Եթե հաջողվի լայն կոալիցիա ստեղծել, ապա բոլորը ձայն են տալու այս միավորմանը: Ես բոլոր ուժերին հրավիրել եմ, հիմա էլ հրավիրում եմ՝ «Ազատ դեմոկրատներ», ՀԱԿ, «Ժառանգություն», «Նոր հայաստան», «Քաղաքացիական պայմանագիր», ՀՀՇ, եթե մեկին մոռացել եմ, հազար ներողություն: Եթե այդ ուժերը միավորվեն, հաղթում են պառլամենտական ընտրություններում»,-ասել է Բագրատյանը:
Ըստ նրա, միանալու դեպքում՝ վիճակահանությամբ են որոշելու ցուցակի հաջոդրականությունը, իսկ քարոզարշավի ծախսը հավասարապես բաշխելու են: Նա հայտարարել է, թե ՀՀԿ-ն 5 տոկոս ձայն չունի, իսկ ՀՅԴ-ի հետ ավելի քիչ ձայն կստանա:
