Երեւանի Պուշկինի փողոցի նախկին մի քանի տասնյակ բնակիչներ, որոնց տները 12 տարի առաջ բացառիկ գերակա հանրային շահ են ճանաչվել եւ քանդվել, իրենց բնակարանների խնդիրը լուծելու պահանջով այսօր` փետրվարի 12-ին, բողոքի ակցիա են անցկացրել նախագահական նստավայրի դիմաց:
Բնակիչներին վրդովեցրել է այն, որ նախագահական նստավայրից իրենց դիմումներին բացասական պատասխան են տվել:
«Զանգել են մեր ակտիվիստներից մեկին, ասել, որ իրենք ոչ մի բան չեն կարող անել: Դե չեն կարողանա էլի, որովհետեւ բաշխել են էդ շենքերն իրար մեջ, հարստացել են: Բողոքելու ենք մինչեւ վերջ, ինչ կանեն, ինչ չեն անի, պայքարելու ենք»,- NEWS.am-ի հետ զրույցում ասաց Պուշկին 2 հասցեի նախկին բնակիչ Վալենտինա Հարությունյանը:
Նշենք, որ քաղաքացիները բողոքի ակցիան անցկացրել են նախագահական նստավայրի դիմացի մայթին, ոստիկանները նրանց թույլ չեն տվել անցնել մյուս մայթ:
Նշենք, որ բնակիչները դեկտեմբերին հանդիպել էին վարչապետ Հովիկ Աբրահամյանի հետ, վերջինը խոստացել էր լուծում տալ իրենց խնդրին, սակայն մինչ այժմ «ոչինչ չի փոխվել, ոչինչ չի արվել»:
Պուշկինի 2 հասցեի նախկին բնակիչ Վալենտինա Հարությունյանն արդեն երկար տարիներ ստիպված է ընտանիքի 6 անդամների հետ ապրել կիսախարխուլ բնակարանում: Բնակարնն իր ընտանիքին է տվել Էդիկ Թախունց անունով մի գործարարը, որը 2004թ. իրենց հետ պայմանագիր է կնքել Պուշկին փողոցում գտնվող տունը քանդելու եւ դրա փոխարեն քաղաքի կենտրոնում նորակառույցում նոր բնակարան տալու վերաբերյալ: Ըստ պայմանագրի՝ Էդիկ Թախունցը պարտավորվել է ընտանիքին տրամարդել 2 տարվա բնակարանավարձ՝ մինչեւ նորակառույցի ավարտը, սակայն 4 ամիս վճարելուց հետո՝ դադարել է բնակարանավարձ տալ: Վալենտինա Հարությունյանն ու իր նման խաբված Պուշկինի շատ բնակիչներ, ստիպված են եղել բնակարանավարձը վճարել ինքնուրույն, մինչեւ որ Էդիկ Թախունցը Երեւանի Շենգավիթ համայնքում 9000 դոլարով գնված կիսակառույց տուն է տվել ընտանիքին: Տիկին Վալենտինան արդեն 12 տարի է Հայաստանի իշխանություններից պահանջում է իր խնդրին ուշադրություն դարձնել, պատժել իրեն ու իր նման խաբված շատ բնակիչների մեծ վնաս հասցրած գործարարին, սակայն մինչեւ այժմ նրա բողոքները ոչ մի արձագանքի չեն արժանացել: