Ներմուծվող դեղերի հայոց լեզվով ներդիրի բացակայությունը հիմք չէ դեղերի ներմուծումը մերժելու համար: Այս մասին այսօր՝ փետրվարի 16-ին, Հայաստանի ԱԺ առողջապահության, մայրության եւ մանկության հարցերի մշտական հանձնաժողովում «Դեղերի մասին» եւ կից օրենքների նախագծերի վերաբերյալ խորհրդարանական լսումների ժամանակ նշել է ՀՀ առողջապահության փոխնախարար Սերգեյ Խաչատրյանը՝ հավելելով, որ Հայաստանում օգտագործվող դեղերի 95 տոկոսը ներմուծվում է արտերկրից, որոնք առավել խիստ են կանոնակարգվում:
ՀԱԿ խմբակցության պատգամավոր Նիկոլ Փաշինյանն արձանաքել է, որ ոչ միայն դեղերի ներդիր թերթիկը պետք է միշտ հայերեն լինի, կարեւոր է նաեւ, որ բժիշկներն էլ խոսեն հայերեն. «Եղբայր, պետք է հիշեցնել, որ ՀՀ-ում պետական լեզուն հայերենն է։ Հիմա դրսում սովորած գործիչներ կան, իրենց թույլատրե՞նք անգլերեն գան զեկուցեն»,-ասել է նա:
Փաշինյանն առաջարկել է նաեւ համացանցում տեղադրել դեղերի մասին տեղեկությունները, ինչին Հանձնաժողովի նախագահ Արա Բաբլոյանն արձագանքել է. «Ինչպե՞ս կարող է գյուղական վայրում մարդը մտնի ինտերնետ, նայի դեղի բաղադրությունն ու օգտագործման ցուցումները»:
