Աղթամարի եկեղեցում նկարահանումներ անելու իրավունքը վերապահված է միայն թուրքական TRT հեռուստաալիքին: Ինչպես Աղթամարից հայտնում է NEWS.am-ի հատուկ թղթակիցը, այլ լրատվամիջոցների ներկայացուցիչներին, հատկապես օտարերկրյա հեռուստաընկերությունների լրագրողներին թույլ են տալիս մեկ-մեկ մտնել եկեղեցի եւ նկարահանումներ կատարել:
Այժմ պատարագի մասնակիցները սպասում են Պոլսո հայոց պատրիարքական փոխանորդ Արամ Աթեշյանի քարոզին: Ակնկալվում է, որ արքեպիսկոպոսն իր ելույթում պետք է շնորհակալություն հայտնի թուրքական իշխանություններին հայկական Սուրբ Խաչ եկեղեցում տարեկան մեկ անգամ կրոնական արարողություն թույլ տալու համար:
Նշենք, որ պատարագին մասնակցում է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի:
