Մուսուլմանական երկրներից ժամանած զբոսաշրջիկները Լեռնային Ղարաբաղում տեսնում են մզկիթների նկատմամբ հոգածությունը։ Այս մասին մարտի 21-ին լրագրողներին ասել է ԼՂՀ էկոնոմիկայի փոխնախարար Սերգեյ Շահվերդյանը։
Նրա խոսքով՝ Ղարաբաղի կառավարությունը միանման է վերաբերում հուշարձանների պահպանմանը՝ անկախ դրանց էթնիկ կամ կրոնական պատկանելիությունից։ Դրա լավագույն ապացույցն այն է, որ ժամանակին իշխանությունները մասնակի վերանորոգել են Շուշի քաղաքի Գյովհար աղայի Վերին մզկիթը։ Ներքին մզկիթը պահպանվում է բավական լավ վիճակում։ Ակնայի (Աղդամ) մզկիթը պահպանվում է եւ բաց է զբոսաշրջիկների համար։ «Իհարկե գալիս են նաեւ զբոսաշրջիկներ մուսուլմանական երկրներից, եւ նրանք կարող են տեսնել, որ ի տարբերություն Ադրբեջանի՝ Ղարաբաղում պահպանվում է այլ կրոնների ժառանգությունը։ Կրոնական եւ մշակութային ժառանգությունից բացի, դա կարեւոր է նաեւ Ղարաբաղում զբոսաշրջության զարգացման համար»,- հավելել է Շահվերդյանը։