Մադրիդյան սկզբունքների հարցում Դաշնակցության դիրքորոշումը նույնն է: Այս մասին, այսօր՝ ապրիլի 21-ին, ԱԺ-ում լրագրողների հետ զրույցում նշել է ՀՅԴ խմբակցության ղեկավար Արմեն Ռուստամյանը:
«Մեր դիրքորոշումը նույնն է: Միջազգային գործընթացն է, որ իր իսկ սկզբունքներին համապատասխան պետք է կարգավորվի: Հակամարտությունների կարգավորման երկու հիմնական սկզբունք գոյություն ունի. «տարածքներ խաղաղության դիմաց», որը մենք մերժել ենք դեռ Լեւոն Տեր-Պետրոսյանի ժամանակ, որովհետեւ խաղաղությունը պարգեւ չէ, որ մեկը մյուսին տա: Մյուս տարբերակը՝ «տարածքներ կարգավիճակի դիմաց», սա էլ Ադրբեջանի թեթեւ ձեռքով գլխիվայր շուռ են տվել, որ սկզբից տարածքներ, հետո՝ կարգավիճակ: Այս սկզբունքը ճիշտ հակառակն է ենթադրում. սկզբից կարգավիճակ, հետո նոր՝ տարածքներ: Այ, եթե վերադառնան այդ տրամաբանությանը, խոսեն կարգավիճակի մասին, խոսեն ինքնորոշման իրավունքի իրացման անհրաժեշտության մասին, բանակցությունները, կարծում եմ, կդառնան ավելի արդյունավետ»,-ընդգծել է Ռուստամյանը: