Թուրքիայի եւ Իսրայելի նախագահները թուրք-իսրայելական հաշիվներ են պարզել CNN-ի եթերում:
«Մենք դեմ չենք Իսրայելին, սակայն իրավունք ունենք քննադատել նրա քաղաքականությունը»,- հայտարարել է Թուրքիայի նախագահ Աբդուլահ Գյուլը։ Պատասխանելով հարցին, թե ինչո՞ւ է ինքը հրաժարվել Նյու Յորքում բանակցություններ վարել Շիմոն Պերեսի հետ, Գյուլը հայտարարել է, որ Իսրայելի ղեկավարները փորձում են արդարացնել իրենց սխալները՝ անհիմն մեղադրանքներ ուղղելով Թուրքիայի հասցեին։ «Ինչպե՞ս կարող եմ ես չնկատել այն փաստը, որ իմ երկրի քաղաքացիներ են սպանվել։ Ինչպե՞ս ես կարող եմ մոռանալ դա»,- ասել է Թուրքիայի ղեկավարը:
Գյուլը հայտարարել է, որ Թուրքիան մեկ անգամ չէ, որ Իսրայելին օգնություն է ցուցաբերել:
Իսրայելի նախագահ Շիմոն Պերեսն իր հերթին հայտարարել է, որ «Մավի Մարմարա» նավի գրոհը սխալ չի համարում։ Պերեսը հիշեցրել է, որ ինքը ցանկանում էր բանակցություններ անցկացնել Գյուլի հետ։ «Որքան ես հասկացա, ինձանից պահանջում էին, որ ես առաջինը ներողություն խնդրեմ։ Դա ինձ ծայրահեղորեն զարմացրեց»,- ասել է Շիմոն Պերեսը։ Նա,սակայն, ավելացրել է, որ Իսրայելի քաղաքականությունը Թուրքիայի հանդեպ չի փոխվել։ «Իսրայելը Թուրքիայի բարեկամն է, մենք ձգտում ենք պահպանել բարեկամությունը»,- հայտարարել է նա։
Նշենք, որ Իսրայելի նախագահ Պերեսը Թուրքիայի նախագահին առաջարկել էր հանդիպել Նյու Յորքում ՄԱԿ-ի Գլխավոր ասամբլեայի 65-րդ նստաշրջանում, սակայն Գյուլը հրաժարվել էր հանդիպումից: