Հայաստանի նախագահը կրակի հետ է խաղում՝ հայտարարելով, թե պատրաստ է Ադրբեջանի հետ պատերազմին։ Նման հայտարարություն է արել Թուրքիայի նախագահ Ռեջեփ Թայիփ Էրդողանը։
Թուրքական Turkiye պարբերականի փոխանցմամբ՝ Թուրքիայի նախագահ Ռեջեփ Թայիփ Էրդողանն անդրադարձել է Արցախի հետ կապված Հայաստանի նախագահի հայտարարությանը՝ կրկին խոսելով Թուրքիայի «բարի կամքի», Թուրքիայում ապրող հայերի ու ապրիլի 24-ի Թուրքիայի նախագահի «ցավակցական» ուղերձին։
Էրդողանը կրկին պնդել է, թե Թուրքիայում 100 հազար հայ կա, որոնցից 50 հազար Հայաստանից են։ «Ապրիլի 24-ին էլ նախորդ տարվա պես ցավակցական ուղերձ հղեցի, սակայն Հայաստանը մեր «բարի կամքը» չի տեսնում։ Սարգսյանը հայտարարում է, որ Հայաստանը պատրաստ է Ադրբեջանի հետ պատերազմին։ Նա կրակի հետ է խաղում ու Թուրքիային էլ մեղադրում»,-ասել է Էրդողանը։
Նշենք, որ Հայաստանի նախագահ Սերժ Սարգսյանը հայտարարել է, որ միջազգային հանրությունը դատապարտում է ուժի կիրառումը Արցախում եւ միայն Թուրքիան է աներկբա աջակցություն հայտնում ադրբեջանական արկածախնդրությանը։
