Հետաքննող լրագրողների միջազգային ընկերակցությունը (ICIJ ) մայիսի 9-ին տվյալների բազա է հրապարակել, որում շուրջ 214 հազար օֆշորային ընկերություններ են ընդգրկված՝ գրանցված 21 տարբեր վայրերում. Նեւադայից մինչեւ Հոնկոնգ եւ Բրիտանական Վիրգինյան կղզիներ:
Այս տեղեկությունը ներկայացվել է, այսպես կոչված, «Պանամյան փաստաթղթերի» հետաքննության շրջանակում, որոնք տեղեկություններ են պարունակում օֆշորային գոտիներում գրանցված ընկերությունների եւ դրանց հետեւում կանգնած մարդկանց մասին:
Արխիվում տեղեկություններ կան նաեւ 100 հազար օֆշորային ընկերությունների մասին, որոնք ICIJ-ը հրապարակել է դեռեւս 2013 թվականին:
Նշենք, որ Հայաստանի բաժնում 37 անուն կա, այդ թվում՝ ԴԱՀԿ նախկին ղեկավար Միհրան Պողոսյանի:
Հիշեցնենք, որ ապրիլին Վաշինգտոնում տեղակայված ICIJ-ը 11.5 մլն փաստաթուղթ է հրապարակել օֆշորային հաշիվների մասին տվյալներով, որոնք պատկանում են նաեւ գործող եւ նախկին մի շարք համաշխարհային առաջնորդների: Հաշվետվությունները հիմնված են Mossack Fonseca ընկերությունից տվյալների արտահոսքի վրա, որն իրավաբանական աջակցություն է ցուցաբերում օֆշորներում գրանցված ընկերություններին:
Պանամյան փաստաթղթերում հայտնաբերված անձանց անդրադարձել է նաեւ «Հետք»-ը: Ցանկում կան քաղաքականության, բիզնեսի, գիտության եւ այլ ոլորտներում հայտնի անձանց եւ նրանց ազգականների անուններ: Պանամյան փաստաթղթերում կան նաեւ սփյուռքահայեր, շատ են հատկապես Ռուսաստանում բնակվող հայերը: Անմասն չեն մնացել նաեւ քրեական հեղինակությունները:
Օրինակ՝ Հայաստանի պետական ճարտարագիտական համալսարանի պրոֆեսոր, ԳԱԱ ակադեմիկոս Հարություն Թերզյան, քաղաքագիտության դոկտոր, Մոսկվայի «Եվրասիական մեդիա գրուփ»-ի նախագահ, 1993-95 թ.թ. ՀՀ ԱԳ նախարարության առաջին քարտուղար Վարդան Տողանյան, ինչպես նաեւ Ուզբեկստանի քաղաքացի Հովիկ Մկրտչյան, ում անունը շոշափվում է փողերի լվացման եւ նարկոառեւտրի գործարքներում, որոնք շաղկապված են Ուզբեկստանի ազգային անվտանգության ծառայության բարձրաստիճան պաշտոնյաների հետ: Ի դեպ, Հովիկ Մկրտչյանը քրեական հեղինակություն Դեդ Հասանի զարմիկն է: Իսկ IDea հիմնադրամի նախագահ Ռուբեն Վարդանյանի անունն այս փաստաթղթերում արտացոլվել է նրա՝ «Տրոյկա դիալոգ»-ը ղեկավարելու տարիների մասով:
