Եվրոպական ներդրումային բանկի ծրագրով նախատեսվում է ապահովել Հայաստանի շուրջ 45 դպրոցի` այդ թվում 15 ավագ դպրոցի սեյսմակայունությունն ու հիմնանորոգումը: Այս մասին նշվել է այսօր՝ հունիսի 1-ին, ՀՀ կրթության եւ գիտության նախարար Լեւոն Մկրտչյանի եւ Եվրոպական ներդրումային բանկի պատվիրակությանը` Հենզ Օլբերսի հանդիպման ժամանակ:
ԿԳՆ-ից NEWS.am-ին հայտնում են, որ ողջունելով պատվիրակներին` նախարարը կարեւորել է Հայաստանում իրականացվող դպրոցների սեյսմակայունության ամրապնդմանն ու բարձրացմանն ուղղված բանկի ծրագիրը, որը փոխլրացնում է Համաշխարհային բանկի եւ Ասիական զարգացման բանկի համանման ծրագրերին:
«Հուսով եմ՝ Եվրոպական ներդրումային բանկի հետ մեր համագործակցությունը երկարատեւ կլինի եւ դպրոցների սեյսմակայունության ամրապնդման այս ծրագրին զուգահեռ մենք հնարավորություն կունենանք իրականացնել կրթության բովանդակային խնդիրներին առնչվող տարատեսակ ծրագրեր` հատկապես հաշվի առնելով այն հանգամանքը, որ բանկի ծրագրերում բավականին մեծ է բովանդակային ծրագրերի աջակցման բաղադրիչը»,-նշել է նախարարը:
Անդրադառնալով կրթության բովանդակային խնդիրներին` Լեւոն Մկրտչյանը տեղեկացրել է, որ այժմ նախարարությունում լուրջ գործընթացներ է ընթանում ավագ դպրոցների, բուհական համակարգի բովանդակության վերափոխման ուղղությամբ, լրամշակվում է բարձրագույն կրթության օրենքի նախագիծը: Նախարարն ակնկալել է նշված բովանդակային ծրագրերի առնչությամբ Եվրոպական ներդրումային բանկի աջակցությունը: Խոսելով եվրոպական ընտանիքի ինտեգրման հնարավորությունների մասին` նախարարը տեղեկացրել է , որ վերջերս Հայաստանն անդամակցել է «Հորիզոն-2020» եվրոպական գիտական ցանցին, որը հայ գիտնականների համար մեծ հնարավորություն է ստեղծում գիտական համատեղ ծրագրեր իրականացնելու համար, ուստի գիտական ոլորտի զարգացման գործում եւս ակնկալում է բանկի աջակցությունը:
Պատվիրակության ղեկավար Հենզ Օլբերսին իր հերթին հույս է հայտնել, որ այս վարկային ծրագրի վերաբերյալ աշնանը նախատեսվող պայամանագիրը խթան կհանդիսանա Հայաստանի կրթության ոլորտի հետագա համագործակցության արդյունավետ կայացմանը: Միաժամանակ, նա պատրաստակամություն է հայտնել աջակցություն ունենալ նաեւ կրթության ոլորտի այլ ծրագրերի աջակցման գործում:
Եվրոպական ներդրումային բանկի այս ծրագրով նախատեսվում է ապահովել Հայաստանի շուրջ 45 դպրոցի` այդ թվում 15 ավագ դպրոցի սեյսմակայունությունն ու հիմնանորոգումը: