Թուրքիայի խորհրդարանի պատգամավորներին անձեռնմխելիությունից զրկելու մասին օրինագիծն անօրինական է եւ խախտում է երկրի` այսօր գործող սահմանադրությունը: Այդ մասին հունիսի 3-ին հայտնել է Թուրքիայի խորհրդարանի պատգամավոր, քրդական Ժողովուրդների ժողովրդավարական կուսակցություն փոխնախագահ, Կարո Պայլանի կուսակցական զինակից Նազմի Գյուրը:
Նրա խոսքով, պատգամավորներին անձեռնմխելիությունից զրկելու հարցի վերաբերյալ վերջնական որոշումը պետք է կայացնի Թուրքիայի նախագահը: «Մենք բոլորս շատ լավ գիտենք, թե որն է այս որոշման նպատակը. խորհրդարանից հեռացնել մեր կուսակցության պատգամավորներին: Երբ նախագահը հաստատի այդ որոշումը, միայն այդ ժամանակ այն իրավական ուժ կստանա: Մեր դիրքորոշումը շատ հստակ է. չենք զիջի ոչ մի դատարանի, ոչ մի որոշման: Կամ մեզ կվերադարձնեն անձեռնմխելիության իրավունքը, կամ կձերբակալեն, այլ տարբերակ չկա», - նշել է Նազմի Գյուրը:
Քուրդ պատգամավորն ընդգծել է, որ Ժողովուրդների ժողովրդավարական կուսակցությունը ոչ մի դեպքում չի զիջի: «Մենք մեր ժողովրդավարական իրավունքները մինչեւ վերջ կօգտագործենք: Այդ ընթացքում, իհարկե, մեր ընկերներից ոմանց կարող են նաեւ ձերբակալել: Ամեն դեպքում բոլորը հասկանում են, որ Թուրքիայում կարող են լուրջ խնդիրներ առաջանալ: Այս որոշումը խնդիր է դարձել նախագահի եւ Թուրքիայում իշխող կուսակցության համար», - ասել է Նազմի Գյուրը: Նրա խոսքով, իր կուսակցության անդամներն անընդհատ բռնության են ենթարկվում: «Բայց մեր կուսակցությունը միայն քրդերի կուսակցություն չէ: Սա Թուրքիայում ապրող բոլոր մարդկանց կուսակցությունն է, եւ հենց դա է մեր հաջողության երաշխիքը», - հավելել է Նազմի Գյուրը:
Ժողովուրդների ժողովրդավարական կուսակցությունը թուրքական խորհրդարանի թվով երրորդ կուսակցությունն է, ներկայումս այն 60 պատգամավոր ունի:
Հիշեցնենք, որ մայիսի 20-ին Թուրքիայի խորհրդարանը երկրորդ փորձից օրինագիծ էր ընդունել պատգամավորներին անձեռնմխելիությունից զրկելու մասին: Այս օրինագիծն ուղղված է քուրդ պատգամավորներին խորհրդարանից հեռացնելուն, որովհետեւ ամենից շատ քրեական գործեր նրանց դեմ են հարուցված: