Ազգային ժողովի նախկին նախագահ Տիգրան Թորոսյանը հրաժարականի դիմում ներկայացնելով՝ ընդամենը կատարել է կուսակցության խորհրդի որոշումը։ Հոկտեմբերի 11-ին լրագրողների հետ հանդիպմանն այս մասին հայտարարեց ՀՀԿ խմբակցության անդամ Գագիկ Մելիքյանը։
Նրա խոսքով, Թորոսյանը պարտավոր էր կատարել այդ որոշումը՝ որպես կուսակցության լիարժեք անդամ։ «Այլ խնդիր գոյություն չի ունեցել։ Պարզապես խախտվել էր կուսակցական կարգապահությունը։ Կուսակցության խորհուրդն էլ նման որոշում էր կայացրել»,- նկատեց Մելիքյանը։
Հիշեցնենք, որ թեեւ ՀՀԿ-ական Տիգրան Թորոսյանը 2008-ին հայտարարում էր, թե հրաժարական չի տա ԱԺ նախագահի պաշտոնից, սակայն ՀՀԿ-ի ճնշման ներքո հրաժարական տվեց եւ անգամ հեռացավ ՀՀԿ-ից:
Անդրադառնալով ՀՀԿ փոխնախագահ Ռազմիկ Զոհրաբյանի օրերս արած հայտարարությանը, թե եթե ՀՀԿ-ն ցանկանա, կարող է թուլացնել ԲՀԿ-ին, հանրապետական պատգամավորն ասաց. «Հզոր քաղաքական ուժերը որեւէ մեկին, առավել եւս կոալիցիոն կուսակցությանը, թուլացնելու նպատակ չեն ունենում»։
«Մեր նպատակները միտված են ուժեղացնել ՀՀԿ-ն։ Իսկ թուլացնել թույլին ուղղակի հակացուցված է եւ դա ուժեղին հարիր չէ»,- ընդգծեց Գագիկ Մելքյանը, ըստ էության, եւս մեկ անգամ ընդգծելով, որ ԲՀԿ-ին համարում են թույլ կուսակցություն:
