![](img/news/34/42/59/default.jpg)
2014 թվականից ի վեր Հայաստանում ԵՏՄ-ին անդամակցության կողմնակիցների թիվը նվազել է, ԵՄ-ինը՝ ավելացել: Այս մասին, այսօր՝ սեպտեմբերի 1-ին, լրագրողների հետ հանդիպման ժամանակ նշել է Հելսինկյան քաղաքացիական ասամբլեայի Վանաձորի գրասենյակի սոցիոլոգ- փորձագետ Ռուբեն Սարգսյանը՝ ներկայացնելով «Դեպի Հյուսի՞ս, թե Արեւմուտք» թեմայով քննարկմանը հասարակական կարծիքի ուսումնասիրության արդյունքները:
Նրա խոսքով, եթե 2014-ին ԵՏՄ-ին անդամակցելու կողմնակից է եղել հարցվածների 38 տոկոսը, իսկ ԵՄ-ին ինտեգրվելու կողմնակիցների թիվը՝ 25 տոկոսը, ապա 2016-ին այդ ցուցանիշները կազմել են համապատասխանաբար 25 տոկոս եւ 41 տոկոս:
ԵՏՄ-ին անդամակցության կողմնակիցների նվազման եւ ԵՄ-ի կողմնակիցների ավելացման միտումը եղել է շարունակական եւ նկատվել է նաեւ 2015 թվականին:
Փորձագետը նշել է, որ հասարակական կարծիքի մեջ այդ փոփոխության միտումը եղել է Հայաստանի բոլոր մարզերում, այդ թվում Երեւանում: ԵՏՄ կողմնակիցների ամենացածր մակարդակը գրանցվել է Սյունիքի մարզում եւ Երեւանում:
Անդրադառնալով նման փոփոխության պատճառներին, ՀԱՔՎ ասոցիացիայի ղեկավար, իրավապաշտպան Արթուր Սաքունցը նշեց. «ԵՏՄ-ին անդամակցության այն հիմնավորումները, որ ներկայացվում էին, ըստ էության, չեն իրականացվել, եւ հանրությունն իր այս վերաբերմունքով փաստում է, որ իր ակնկալիքները բավարարված չեն: Պատճառները տնտեսական են, անվտանգության ակնկալիքները նույնպես բավարարված չեն»:
Նշենք, որ վերջին հարցումն անցկացվել է 2016-ի օգոստոսին, Հելսինկյան Քաղաքացիական Ասամբլեայի Վանաձորի գրասենյակի կողմից «Հասարակական հետազոտությունների առաջատար խումբ» հասարակական կազմակերպության (APR Group) ներգրավմամբ: Ուսումնասիրությունն իրականացվել է 1200 հոգու շրջանակներում (95% վստահության միջակայքում, ±2.8% սխալի մեծությամբ), կիսաստանդարտացված հարցազրույցների մեթոդով՝ CAPI-ի տեխնիկայի կիրառմամբ: Ստացված տվյալները համեմատվել են նախորդ երկու տարիներին (2014թ. եւ 2015թ.) իրականացված նմանատիպ հետազոտությունների արդյունքների հետ: