Եվրոպայի խորհրդի խորհրդարանական վեհաժողովի իրավական հարցերի եւ մարդու իրավունքների հանձնաժողովում այսօր՝ հոկտեմբերի 11-ին, տեղի է ունեցել ահաբեկչության վերաբերյալ քննարկում «Ոչ ատելություն, ոչ վախ» (No hate No fear) խորագրով:
NEWS.am-ի հատուկ թղթակիցը հաղորդում է Ստրասբուրգից, որ հանձնաժողովի նիստին մասնակցում էին ԵԽԽՎ նախագահ Պեդրո Ագրամունտը, Լուսիանա Միլանին եւ Անտոնի Լիրիսը, որոնց դուստրն ու կինը համապատասխանաբար զոհվել են «Բատակլանում» 2015թ. նոյեմբերի 13-ին:
Լուսիանա Միլանին ներկաներին պատմեց, որ իր կյանքը բաժանվել է երկու մասի՝ նոյեմբերի 13-ից առաջ, երբ ինքը երջանիկ կին էր, եւ նոյեմբերի 13-ից հետո, երբ ինքը կորցրել է դստերն ու կյանքն ամբողջովին փոխվել է:
«Ահաբեկչության հետեւանքով զոհվածները ատելության զոհ են, բայց ո՞րն էր պատճառը, ես չեմ հասկանում: Ահաբեկչություն իրականացնողները բոլորը երիտասարդ են եւ սպանում են իրենց նման երիտասարդներին: Մտածում եմ՝ ի՞նչ են զգում մարդասպանների մայրերը, երբ իմանում են, թե ինչ են արել իրենց երեխաները»,- ասաց դստերը կորցրած կինը:
Լուսիանա Միլանին նշեց, որ մարդկանց աջակցությունն իրենց համար շատ կարեւոր է, իրենք զգում են նաեւ Ֆրանսիայի իշխանությունների աջակցությունը, սակայն լավ կլիներ, թե եվրոպական կառույցների նույնպես դա զգային:
Այնուհետեւ ելույթ ունեցավ Անտոնի Լիրիսը, որի կինը զոհվել է Փարիզի ահաբեկչությունների ժամանակ: Ըստ Լիրիսի՝ վախը երաժշտության տեսակ է, որը ստիպված ես լսել ամբողջ մարմնով:
«Դուք չպետք է մոռանաք, որ մեզնից մեկն եք: Այստեղ գալիս հենց այս մասին էի մտածում. դուք չպետք է մոռանաք, որ այս հասարակության մի մասնիկն եք, դուք մեզնից մեկն եք ու պետք է զգաք այն, ինչ մենք ենք ուզում: Ոչ ատելություն, ոչ վախ. սա միայն սկիզբն է, պետք է ընդունել վախը, միայն դրանից հետո է հնարավոր առաջ գնալ: Փարիզի ահաբեկչությունից օրեր անց ֆրանսիացիները վերսկսեցին իրենց բնականոն կյանքը, սակայն միեւնույնն է՝ վախենում էին, պետք է հաղթահարել դա»,- ասաց Լիրիսը:
Ներկա պատգամավորներն իրենց աջակցությունը հայտնեցին զոհվածների ընտանիքներին, ողջունեցին Լիրիսին եւ Միլանին, որ եկել ու խոսում էին իրենց զգացմունքների եւ ապրումների մասին:
Հանձնաժողովի քննարկմանը մասնակցում էր նաեւ Միացյալ թագավորության հակաահաբեկչական օրենքի անկախ փորձագետ Դեյվիդ Անդերսոնը, որն իր խոսքում ընդգծեց՝ խիստ օրենքներով պետք է պայքարել ահաբեկչության դեմ:
«Մենք պետք է պաշտպանենք մարդկանց իրավունքները, պետք է աջակցենք բոլորին: Պետք է խոստորեն պատժվեն բոլոր նրանք, որոնք բռնություն են գործադրում»,- ասաց նա:
Հիշեցնենք, որ 2015թ. նոյեմբերի 13-ի ուշ երեկոյան Փարիզի միանգամից 6 շրջանում ահաբեկչություններ էին տեղի ունեցել, որոնց հետեւանքով զոհվել էր 129 մարդ։ Ահաբեկիչները գրոհել էին նաեւ «Բատակլան» թատրոնի շենքը եւ սպանել ներսում գտնվող մարդկանց:
Աիդա Հովհաննիսյան, Ստրասբուրգ