ԵԽ հայաստանյան գրասենյակը Հայաստանի 4 համայնքներում (Ախթալա, Արթիկ, Ուրցաձոր եւ Վարդենիկ) գնահատել է մասնակցային կառավարման արդյունքները եւ արձանագրել, որ այնտեղ ՏԻՄ կառավարմանը մասնակցելու մշակույթ է ձեւավորվել:
Երեւանում Եվրոպայի խորհրդի գրասենյակից NEWS.am-ին հայտնում են, որ դեռեւս մեկ տարի առաջ, ԵԽ-ն «Աջակցություն Հայաստանում տեղական ժողովրդավարության ամրապնդմանը» ծրագրի շրջանակում, չորս գործընկեր (Ախթալա, Արթիկ, Ուրցաձոր եւ Վարդենիկ) համայնքներին աջակցություն է ցուցաբերել քաղաքացիների մասնակցության նոր նախաձեռնություններ իրականացնելու համար:
Երեւանում Եվրոպայի խորհրդի (ԵԽ) գրասենյակը հոկտեմբերի 27-28-ին Արթիկ եւ Ուրցաձոր համայնքներում կազմակերպել էր ճանաչողական այց՝ նշված համայնքներում քաղաքացիների մասնակցության նախաձեռնությունները գնահատելու եւ գործընկերային փորձի փոխանակում իրականացնելու նպատակով:
Այցին տեղական կազմակերպություններից բացի, մասնակցում էին նաեւ Եվրոպայի խորհրդի Տեղական եւ տարածքային իշխանությունների կոնգրեսի փորձագետները: Այցի նպատակն էր գնահատել տեղական նախաձեռնությունների արդյունքները՝ հաջողություններ, մարտահրավերներ եւ քաղված դասեր, փոխանակել քաղաքացիների մասնակցության ոլորտում ունեցած փորձը, տարածել հանրային որոշումների կայացման լավագույն փորձը՝ որպես տեղական ժողովրդավարության առանցքային սկզբունքներից մեկը:
Երկօրյա քննարկման ընթացքում ներկայացվեց շահառու չորս համայնքում քաղաքացներին ներգրավելու գործիքակազմը (քննարկումներ, տարբեր աշխատանքային խմբերի ձեւավորում, հանրային քննարկում, համայնքային ժողովներ, առցանց եղանակով տարբեր հարցումներ, հանրային կարծիքի հարցում եւ այլն), ինչպես նաեւ դրանց շարունակական կիրառման հնարավորությունները, տեղական կառավարման հարցում բնակչությանն ակտիվացնելու ու նրա վստահությունը ձեռք բերելու առավելությունները:
Նշվեց, որ մասնակցային կառավարման արդյունքում բարձրացել է համայնքապետարանների աշխատանքների թափանցիկությունը, շահառու չորս համայնքում ՏԻՄ կառավարմանը մասնակցելու մշակույթ է ձեւավորվել: Բնակիչները եւս կրթվել են՝ վերածվելով իրենց լիազորություններն ըմբռնող քաղաքացու: Տարբեր գաղափարներ կամ կարծիքներ ունեցող մարդկանց համախմբումը միեւնույն գաղափարի շուրջ ծառայել է ի շահ համայնքի, մեծացել է տեղական իշխանությունների նկատմամբ վստահությունը:
Եվրոպայի խորհրդի Տեղական եւ տարածքային իշխանությունների կոնգրեսի համագործակցության ծրագրերի բաժնի ղեկավար Մարիտե Մորասն ամփոփելով երկօրյա այցից ստացած տպավորություններն` ասաց• «Որպեսզի տեղական ժողովրդավարությունն ամրապնդվի եւ «Տեղական ինքնակառավարման եվրոպական խարտիան» իրականացվի, մեզ հարկավոր են հզոր, ընտրված համայնքի ղեկավարներ ու ավագանու անդամներ, անհրաժեշտ են նաեւ տեղական առաջնորդներ: Հայաստանում մեր ծրագրի գործունեությունն ուղղված է հենց այդ առաջնորդներին եւ տեղական ժողովրդավարության ամրապնդմանը: Տեղերում դուք ձեր առանձնահատկություններն եք բերում տեղական ժողովրդավարության մեջ, բայց ամենակարեւորն այն է, որ միասին աշխատելով` կարող ենք բարձրացնել քաղաքացիների կյանքի որակը: Կարծում եմ, կարող ենք փոփոխությունների հասնել, որոնք մենք պետք է իրականացնենք, համայնքի ղեկավարների, ավագանու անդամների, ու տեղական առաջնորդների հետ»: