Իրանական գործարքը հակասական էր ԱՄՆ որոշ քաղաքական գործիչների համար։ Այս մասին NEWS.am–ի թղթակցի հետ զրույցում ասել է Հարավային Կովկասում ՆԱՏՕ-ի գրասենյակի ղեկավար, դեսպան Ուիլյամ Լախյուն։
Նրա խոսքով, հայտնի չէ՝ արդյոք ԱՄՆ նոր նախագահ Դոնալդ Թրամփը հետքայլ կանի իրանական միջուկային ծրագրի շուրջ բանակցություններում։ «Եւ ես չեմ կարող այդ հարցի վերաբերյալ ենթադրություններ անել։ Այն, ինչ նա ասել է նախագահական քարոզարշավի ընթացքում, կարող է զգալիորեն տարբերվել նրանից, ինչ նա կանի նախագահի պաշտոնում։ Ոչ ոք դեռ չգիտի՝ ինչ ակնկալել»,- ասել է Ուիլյամ Լախյուն։
Անդրադառնալով Թրամփի կառավարման ժամանակ Ռուսաստանի հետ ԱՄՆ հարաբերություններում հնարավոր փոփոխություններին, դեսպանը նշել է․ «Կարեւոր է չչափազանցնել հնարավոր փոփոխությունները։ Միացյալ նահանգներում շատ ուժեղ կառույցներ կան, որոնք զգալի ազդում են երկրի արտաքին քաղաքականության վրա։ Եվ նախագահը ինքնուրույն չի որոշում ԱՄՆ արտաքին քաղաքականությունը։ Հետեւաբար, այս հարցում կան նաեւ այլ խաղացողներ։ Դրա համար էլ, երբ խոսքը լուրջ հարցերի՝ օրինակ Ռուսաստանի եւ Իրանի հետ հարաբերությունների մասին է, մենք հույս ունենք, որ դրանք կբարելավվեն»։
Հիշեցնենք, որ նախընտրական քարոզչության ընթացքում Դոնալդ Թրամփը հայտնել էր, որ Իրանի կառավարության հետ միջուկային գործարքը խայտառակություն էր Վաշինգթոնի համար։