ԱՄՆ-ը մտահոգություն է հայտնել Ադրբեջանի Գերագույն դատարանի որոշման կապակցությամբ՝ մերժել ազատազրկման մեջ գտնվող ընդդիմադիր Իլգար Մամեդովի վերաքննիչ բողոքը: Այս մասին հայտնում է «Ամերիկայի ձայն»-ը:
«ԱՄՆ-ը միանում է Եվրոպայի խորհրդին, Եվրամիությանը եւ այն կազմակերպություններին, որոնք մտահոգություն են հայտնել Ադրբեջանի Գերագույն դատարանի նոյեմբերի 18-ի որոշման կապակցությամբ՝ մերժել РеАл («Հանրապետական ալընտրանք») շարժման առաջնորդ Իլգար Մամեդովի վերաքննիչ բողոքը»,- նշված է Պետքարտուղարության ներկայացուցիչ Ջոն Քիրբիի հայտարարության մեջ:
Մամեդովը կալանավորվել է 2013 թվականին եւ Ադրբեջանում ապօրինի ճանաչված քաղաքական գործունեության համար դատապարտվել 7 տարի ժամկետով ազատազրկման: Նրա դատավճիռը հարուցել է Եվրոպայի եւ աշխարհի այլ երկրների իրավապաշտպանների քննադատությունը:
«Մենք Ադրբեջանի իշխանություններին կոչ ենք անում ՄԻԵԴ որոշման համաձայն Մամեդովին առաջադրված բոլոր մեղադրանքները չեղարկել եւ նրան ու իրենց հիմնարար ազատությունների իրականացման համար բանտարկված մյուս անձանց ազատ արձակել»,- հայտարարել է Քիրբին: