Լեհաստանը մտադիր է Մեծ Բրիտանիայից պահանջել ԵՄ ներքին շուկայի ազատությունների պահպանում։Այս մասին հայտնել է Լեհաստանի ԱԳ նախարար Վիտոլդ Վաշչիկովսկին Իռլանդիա կատարած այցի ժամանակ։
Վիտոլդ Վաշչիկովսկին հանդիպել է լեհական համայնքի հետ Դուբլինում, որտեղ քննարկել է լեհ միգրանտների դրությունը ԵՄ-ից Բրիտանիայի դուրս գալուց հետո։ Նրա խոսքով, եթե Մեծ Բրիտանիայի իշխանությունները մտադիր են մնալ ԵՄ շուկայական ազատությունների գոտում, նրանք պարտավոր կինեն այդ ազատություններն ապահովել նաև Մեծ Բրիտանիայում բնակվող լեհերի նկատմամբ։ «Մենք համարում ենք, որ Մեծ Բրիտանիայում բնակվող լեհերի կարգավիճակը պետք է սիմետրիկ լինի, այսինքն այնպիսին, ինչպիսին ԵՄ-ում բնակվող բրիտանացիների կարգավիճակն է լինելու։ Մենք մտադիր ենք պահանջել, որ Մեծ Բրիտանիան ապահովի այն չորս ազատությունները, որոնք ամրագրված են ԵՄ պայմանագրում, այսինքն ապրանքների, ծառայությունների, կապիտալի ու մարդկանց ազատ տեղաշարժը»,- նշել է Լեհաստանի դիվանագիտության ղեկավարը, հայտնում է Լեհաստանի ռադիոն։
Վաշչիկովսկու գնահատականով, Լոնդոնի ու Բրյուսելի միջեւ բանակցային գործընթացը կարող է մի քանի տարի տեւել։ Նա նշել է, որ «բրեքսիթի» թեման գլխավորներից մեկն է լինելու Իռալնդիայի արտգործնախարար Չառլզ Ֆլանագանի հետ լեհական պատվիրակության այսօրվա բանակցություններում։
