ՆԱՏՕ-ի գլխավոր քարտուղար Յենս Ստոլտենբերգն իր ելույթում մոռացել է Հայաստանը որպես Թուրքիայի հետ սահմանակից պետություն նշել: Այս մասին նոյեմբերի 25-ին լրագրողների հետ հանդիպմանը հայտարարել է Ազգային ժողովի ՀՀԿ խմբակցության պատգամավոր, ՆԱՏՕ-ի Խորհրդարանական վեհաժողովում Հայաստանի պատվիրակության ղեկավար Կորյուն Նահապետյանը:
ՆԱՏՕ-ի ԽՎ-ի լիագումար նիստի ընթացքում, ըստ պատգամավորի, հայկական պատվիրակությանը հնարավորություն է ընձեռվել հարց ուղղել դաշինքի գլխավոր քարտուղար Յենս Ստոլտենբերգին: «Մենք անդրադարձանք հայ-թուրքական սահմանի բացման հեռանկարներին եւ այդ հարցում ՆԱՏՕ-ի հնարավոր աջակցությանը: Նոյեմբերի 18-ին գերմանական Մարշալի հիմնադրամում ելույթի ժամանակ նա հիշատակել էր Թուրքիայի ռազմավարական աշխարհագրական դիրքի մասին՝ նշելով, որ հյուսիսից Թուրքիան սահմանակից է Ռուսաստանին եւ Վրաստանին, հարավից՝ Իրաքին եւ Սիրիային: Նա մոռացել էր մատնանշել Հայաստանը: Մենք բարձրացրեցինք այդ հարցը եւ հետաքրքրվեցինք, թե ինչո՞վ է դա պայմանավորված»,- նշել է Նահապետյանը՝ հավելելով, որ Հայաստանը նույնպես Թուրքիային սահմանակից է եւ, 1990-ական թվականներից սկսած, Թուրքիան միակողմ փակել է հայ-թուրքական սահմանը, ինչը լուրջ մարտահրավել է տարածաշրջանի անվտանգության համար:
«Ստոլտենբերգը պատասխանեց, որ հայ-թուրքական սահմանի բացումը երկու պետությունների խնդիրն է, եւ ՆԱՏՕ-ն չի կարող այս հարցում որեւէ դեր խաղալ»,- ամփոփել է Կորյուն Նահապետյանը: