ՄԱԿ գլխավոր քարտուղար Բան Կի Մունը խորապես մտահոգված է անցյալ շաբաթ Կենտրոնաֆրիկական Հանրապետությունում բռնկված բռնությամբ, եւ զինված կազմավորումներին կոչ է անում անհապաղ բռնությունը դադարեցնել պատերազմի հետեւանքով ծվատվող երկրում: Այս մասին հայտնում է «Սինհուա»-ն:
Գլխավոր քարտուղարի հայտարարության մեջ նշված է, որ անցյալ շաբաթ Վերին Կոտո նահանգում «Սելեկա» խմբավորման երկու նախկին ջոկատների միջեւ տեղի են ունեցել բախումներ, որոնց ընթացքում, ըստ հաղորդումների, տասնյակ մարդիկ են զոհվել, ավելի քան 11 հազար մարդ զրկվել է տնից, որոնց մեծամասնությունը խաղաղ բնակիչներ են: ՄԱԿ գլխավոր քարտուղարը խորը մտահոգություն է հայտնել աֆրիկական այս երկրում բռնության ալիքի կապակցությամբ:
Բան Կի-Մունն այս զինված կազմավորումներին կոչ է արել անհապաղ դադարեցնել բռնությամբ ուղեկցվող հարձակումները, իրագործել զինաթափման պլանը, զորացրվել եւ հասարակություն վերադառնալ՝ հակամարտությունն արմատապես լուծելու համար: Հայտարարության մեջ նշված է, որ Կենտրոնական Աֆրիկայի երկրների Տնտեսական միության հատուկ գագաթնաժողովը տեղի կունենա նոյեմբերի 30-ին՝ Գաբոնի մայրաքաղաք Լիբրեւիլում, եւ Բան Կի-Մունը հուսով է, որ գագաթնաժողովի ընթացքում ԿԱՀ-ում խաղաղության իրականացման եւ վերականգնման ու կայունության ճանապարհին անցնելու հարցում երկրին օգնություն ցուցաբերելու ջանքերը կբազմապատկվեն:
