Նանոտեխնոլոգիաների ոլորտում Իրանի եւ Հայաստանի միջեւ կարող է լուրջ համագործակցություն ձեւավորվել: Այս մասին, այսօր՝ նոյեմբերի 30-ին, Հայաստանում Իրանի արտակարգ եւ լիազոր դեսպան Սեյեդ Քազեմ Սաջադին եւ ԻԻՀ նանոտեխնոլոգիաների գլխավոր շտաբի ղեկավար, պրոֆեսոր Սայեդ Սարքարի հետ հանդիպման ժամանակ նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Նախարարությունից NEWS.am-ին հայտնում են, որ շնորհակալություն հայտնելով այցելության համար՝ նախարարը նշեց, որ բարձր է գնահատում ԻԻՀ հետ համագործակցությունը տրանսպորտի ու կապի ոլորտում եւ լիահույս է, որ այն կձեւավորվի եւ կամրապնդվի նաեւ տեղեկատվական տեխնոլոգիաների բնագավառում։
Պրոֆեսոր Սայեդ Սարքարին, հանգամանորեն ներկայացնելով նանոտեխնոլոգիաների ոլորտում ԻԻՀ ունեցած ձեռքբերումները եւ գործունեության շրջանակներն, ընդգծեց, որ նանոտեխնոլոգիաների ոլորտում Իրանի եւ Հայաստանի միջեւ կարող է լուրջ համագործակցություն ձեւավորվել։
Նախարարը, ողջունելով համագործակցության առաջարկը, նշեց, որ Հայաստանում նախատեսվում է կառուցել ինժեներական քաղաք, որտեղ ներկայացված կլինեն այնպիսի միջազգային կազմակերպություններ, որոնք հաջողությունների են հասել տեխնոլոգիաների ոլորտում, եւ առաջարկեց, որպեսզի իրանական կողմը նույնպես ներկայացված լինի։
Պրոֆեսոր Սայեդ Սարքարին ընդունելով առաջարկը՝ ընդգծեց այս ոլորտում համատեղ ծրագրերի կարեւորությունը։
Հանդիպման ընթացքում քննարկվեցին ՏՏ եւ նանոտեխնոլոգիաների ոլորտում համագործակցության հնարավորությունները, կապի եւ տրանսպորտի ոլորտում երկկողմ գործակցության շրջանակները մեծացնելու հետ կապված մի շարք հարցեր։