Թիվ 27 դպրոցի տնօրենի ապօրինությունները սանձելը Ձեր ուժերից վեր է: Այս մասին բաց նամակով Երեւանի քաղաքապետ Տարոն Մարգարյանին է դիմել Երեւանի ավագանու «Բարեւ Երեւան» խմբակցության անդամ Անահիտ Բախշյանը:
Նամակում, մասնավորապես ասվում է.
«Թիվ 27 դպրոցի տնօրենի ապօրինությունների մասին այսօր նամակով դիմեցի քաղաքապետ Տարոն Մարգարյանին: Նամակի բովանդակությունը՝ ստորեւ.
«Երեւանի թ. 27 դպրոցի մասնագիտական աջակցության գծով փոխտնօրեն Գայանե Ավետիսյանը հոկտեմբերի 21-ից ազատվել է աշխատանքից: Նա այդ դպրոցում երկրորդ անգամ նշանակվել էր փոխտնօրենի պաշտոնում ՀՀ կառավարության 14.10.2010 թ. N1391՝ «ՀՀ ընդհանուր ծրագրեր իրականացնող հանրակրթական ուսումնական հաստատության մանկավարժական աշխատողների պաշտոնների անվանացանկը եւ նկարագրերը հաստատելու մասին» որոշման խախտումով: «Հանրակրթության մասին» ՀՀ օրենքի 31-րդ հոդվածի 2-րդ կետի համաձայն՝ Երեւանի քաղաքապետը «...Վերահսկում է ուսումնական հաստատությունների կողմից Հայաստանի Հանրապետության կրթության մասին օրենսդրության եւ կրթության պետական կառավարման լիազորված մարմնի ընդունած նորմատիվ ակտերի կատարումը, կրթական ծրագրերի իրականացումը` հանրակրթության պետական չափորոշչին համապատասխան»: Այս դեպքում տվյալ դպրոցի տնօրենի կողմից տեղի է ունեցել նորմատիվ իրավական փաստաթղթին անհամապատասխան գործողություն:
Տնօրենի հրամանով Գայանե Ավետիսյանն արդեն ազատվել է աշխատանքից, սակայն խնդրում եմ պարզաբանել, թե որպես վերահսկողություն իրականացնող պետական մարմին՝ Ձեր կողմից ինչ քայլեր են ձեռնարկվել տվյալ տնօրենին կարգի հրավիրելու եւ այլ դպրոցներում նման քայլերը կանխելու համար, որոնք կարելի է բացահայտել դպրոցների տարիֆիկացիաները ուսումնասիրելու դեպքում: Արդեն ոչ թե տպավորություն, այլ փաստ է, որ այդ տնօրենի ապօրինությունները սանձելը Ձեր ուժերից վեր է: Խնդրում եմ նաեւ տեղեկացնել, թե ով է այժմ հրամանագրված թ.27 դպրոցի ՄԿԱ գծով փոխտնօրենի պաշտոնում»:
