Skyscanner տուրիստական ծառայությունը ռուսաստանցիների շրջանում ամանորյա հանգիստն Հայաստանում անցկացնելու պահանջարկի ռեկորդային աճ է գրանցել, հայտնում է Lenta–ն՝ վկայակոչելով կազմակերպության մամուլի ծառայությունը։
Փորձագետները վերլուծել են առաջիկա տոների համար ավիատոմսերի եւ հյուրանոցներից ամրագրման մասին տվյալները։ Պարզվել է, որ Հայաստանի նկատմամբ հետաքրքրությունը, նախորդ տարվա նույն ժամանակաշրջանի համեմատ, 119 տոկոսով աճել է։
Կիպրոսում հանգիստ ամրագրողների թիվն աճել է 70 տոկոսով, Ադրբեջանում՝ 69 տոկոսով։ Ռուսաստանցիները սկսել են ավելի շատ հետաքրքրվել Հունաստանում հանգստով՝ 53 տոկոս, Վրաստանում՝ 40 տոկոսով։
Ամենատարածված արտասահմանյան ուղղությունը Թաիլանդն է, երկրորդ տեղում՝ Իտալիան, երրորդը՝ Հունաստանը։ Լավագույն տասնյակում են Իսպանիան, Չեխիան, Թուրքիան, Վրաստանը, Ֆրանսիան, ԱՄՆ–ը եւ ԱՄԷ–ն։