Հայաստանում տեղական իշխանությունները կարող են նոր վճարումներ գանձել։ Այս մասին դեկտեմբերի 5-ին ԱԺ–ում ասել է տարածքային կառավարման եւ զարգացման փոխնախարար Վաչե Տերտերյանը՝ ներկայացնելով «Տեղական տուրքերի եւ վճարումների մասին» օրենքի նոր նախագիծը։
Եթե գործող օրենքը թույլատրում է տուրքերի 16 տեսակ եւ վճարումների 5, ապա առաջարկվող նախագծով՝ համապատասխանաբար 18 եւ 19։ Այս վճարումներից մի քանիսը դե ֆակտո արդեն գանձվում են համայնքներում, ուստի դրանք հիմա պարզապես կամրագրվեն օրենքով։ Սրան են վերաբերում նաեւ ջրամատակարարման վճարումները, եթե համայնքը դա սեփակա ուժերով է կազմակերպում, ինչպես նաեւ համայնքային մանկապարտեզի օգտագործման համար վճարումները։
Օրինագծով ամրագրվում է վճարովի կայանատեղիներ կազմակերպելու համայնքների իրավունքը։ Դրանից բացի, տեղական իշխանություններին թույլատրում են հանրային հանգստի եւ տոնավաճառների վճարովի տեղեր կազմակերպել։