Բոլիվիացի օդաչու Միգել Կիրոգան, որը վարել էր անցած շաբաթ Կոլումբիայում կործանված LaMia ընկերության օդանավը Բոլիվիայում քրեական հետապնդման մեջ էր, նույնիսկ կալանված է եղել: Այս մասին հայտնում է «ՌԻԱ Նովոստի»-ն:
«Կիրոգան դատարանով հետապնդվել է Բոլիվիայի ռազմաօդային ուժերի կողմից, նրա նկատմամբ եղել է նաեւ դատարանի հարկադիր կատարաման որոշում»,- մամուլի ասուլիսում հայտարարել է Բոլիվիայի պաշտպանության նախարար Ռեյմի Ֆերեյրան:
Նախարարի խոսքով՝ Կիրոգան եւ եւս 4 օդաչու ինքնակամ լքել են ՌՕՈւ-ում ծառայությունը, ինչի համար դատական հետապնդման մեջ էին: Բոլիվիայի օրենքներով պետության հաշվին կրթություն ստացած եւ օդաչուի պատրաստում անցած անձինք պետք է որոշակի ժամանակով ծառայեն ՌՕՈւ-ում, սակայն Կիրոգան եւ նրա ընկերները որոշել էին սահմանված ժամկետից վաղ ազատվել:
Նախարարը հայտարարել է նաեւ ՌՕՈւ-ին ունեցած LaMia ընկերության պարտքի մասին ընկերության օդանավերը նորոգելու եւ պահպանելու համար: Կիրոգան փոխադրողի բաժնետերերից մեկն էր եւ 5 ամիս առաջ պարտքերի պատճառով ձերբակալվել եր, սակայն կարողացել էր ազատվել:
«LaMia-ն 2014 թվականին ՌՕՈւ-ին 3 ինքնաթիռ է տվել վերանորոգելու համար, սակայն միայն գումարի կեսն է վճարել, օդանավերից երկուսն այդպես էլ չի վերցրել, չի վճարել նաեւ պահպանելու համար, այդ օդանվերը մինչ օրս կալանված են»,- ասել է Ֆերեյրան:
LaMia-ի օդանավը կործանվել է նոյեմբերի 29-ին Կոլումբիայում՝ Մեդելինից 50 կմ հեռավորությամբ: Օդանավում եղել է 77 մարդ՝ անձնակազմի 9 անդամ եւ 68 ուղեւոր, այդ թվում՝ բրազիլական «Շապեկոենսե» ֆուտբոլային թիմը:
