Մենք դեռեւս հույս ունենք, որ Լեռնային Ղարաբաղի հակամարտության շուրջ Վիեննայում եւ Սանկտ-Պետերբուրգում ձեռքբերված համաձայնությունները կյանքի կկոչվեն: Այս մասինմ այսօր՝ դեկտեմբերի 8-ին, Համբուրգում ընթացող ԵԱՀԿ երկրենրի ԱԳ նախարարների խորհրդի 23-րդ նիստի ժամանակ իր խոսքում նշել է ԵՄ դիվանագիտության ղեկավար Ֆեդերիկա Մոգերինին:
Նրա խոսքով, Եվրամիությունը կոչ է անում հակամարտության կողմերին բանակցություններ վարել ԵԱՀԿ Մինսկի խմբի կողմից ներկայացված առաջարկների շուրջ: Մոգերինին ընդգծել է, որ Եվրամիությունը կշարունակի աջակցել Եվրոպայի տարածքում բոլոր հակամարտության կարգավորմանը՝ գոյություն ունեցող ձեւաչափերի շրջանակում:
Ավելի վաղ NEWS.am-ը հայտնել էր, որ Համբուրգում ընթացող ԵԱՀԿ անդամ պետությունների արտգործնախարարների 23-րդ խորհրդի շրջանակներում Հայաստանի արտգործնախարար Էդվարդ Նալբանդյանն այսօր հանդիպել է ԵԱՀԿ Մինսկի խմբի համանախագահներ Իգոր Պոպովի, Ջեյմս Ուորլիքի, Ստեֆան Վիսկոնտիի և ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ:
Նալբանդյանն ընդգծել է, որ Ադրբեջանն արդեն մի քանի ամիս է, որ մերժում է իրականացնել Վիեննայի և Սանկտ-Պետերբուրգի գագաթաժողովներին նախագահների մակարդակով ձեռք բերված պայմանավորվածությունները՝ դրանով իսկ խոչընդոտելով բանակցային գործընթացի առաջ մղման նպատակով համապատասխան պայմանների ստեղծմանը։