2017-ի խորհրդարանական ընտրություններին մասնակցելու հայտ ներկայացրած ավանդական Սոցիալ դեմոկրատ հնչակյան եւ Ռամկավար ազատական կուսակցությունները պատրաստվում են մեծ համաժողովի։ NEWS.am-ին հայտնի դարձավ, որ համաժողովը անցկացվելու է հունվարին՝ Երեւանում, որին կմասնակցեն նաեւ Սփյուռքից հյուրեր։
Նշենք, որ կուսակցությունները քննարկում են միասնական դաշիքնով մասնակցելու հարցը, սակայն քննարկումներ են ընթանում նաեւ այլ ուժերի հետ։ Օրեր առաջ ՌԱԿ-ը հանդիպում է ունեցել մի շարք ուժերի ներկայացուցիչների հետ եւ քննարկել ընտրություններին մասնակցելու հարցը։
Թե ինչ ձեւաչափով ավանդական ուժերը կմտնեն ընտրապայքարի մեջ, վերջնականապես հայտնի կլինի սպասվող մեծ համաժողովից հետո։ Ի դեպ ավանդական կուսակցությունների ընտրություններին մասնակցելու վերաբերյալ ՀՅԴ խմբակցության ղեկավար Արմեն Ռուստամյանը լրագրողների հետ զրույցում ասել էր իրենք համահայկական հարթության մեջ համագործակցում են միմյանց հետ, սակայն ընտրություններին մասնակցելու հետ կապված նախ պետք է լուծեն իրենց կառույցների հետ խնդիրները։
«Մենք ընդհանրապես համարում ենք, որ ավանդական կուսակցությունները մեր ժողովրդի ձեռքբերումն ու հարստությունն է ավանդական կուսակցություների լինելը բխում է մեր ժողովրդի արմատական շահերից»,-ասել էր Ռուստամյանը։