Եվրասիական տնտեսական միությունում Հայաստանի համար գլխավոր խաղացողը Ռուսաստանն է, մինչդեռ ԵՏՄ-ի մյուս երկրների հետ նրա քաղաքական, տնտեսական եւ կրոնական շահերը չեն համընկնում: Դեկտեմբերի 8-ին՝ «Եվրասիական եւ եվրոպական ուղղությունների միջեւ Հայաստանի արտաքին քաղաքականությունը» թեմայով կլոր սեղանի ընթացքում այս մասին հայտարարեց Հայաստանի գործատուների միության նախագահ Գագիկ Մակարյանը:
Նրա խոսքով՝ ԵՏՄ-ին Հայաստանի անդամակցության ենթատեքստում Երեւանի համար կարեւոր է այնպիսի դիրքի հասնել, որի պարագայում կկարողանա Եվրամիության հետ ինքնուրույն տնտեսական համագործակցության բանակցություններ վարել: Մակարյանը նաեւ ընդգծեց Իրանի գործոնի կարեւորությունը՝ նշելով, որ եթե Հայաստանը կարողանա Իրանի եւ ԵՏՄ-ի միջեւ տարանցիկ երկիր դառնալ, ապա քիչ շահույթ չի ունենա: «Եվրամիության համար Հայաստանը կարող է միանգամայն գրավիչ լինել, եթե Իրանի հետ զույգով հանդես գա»,- նշեց ՀԿ նախագահը՝ հավելելով, որ Երեւանի, Թեհրանի եւ ԵՄ-ի միջեւ առեւտրի ազատ գոտու ստեղծումը Հայաստանը տարածաշրջանային կարեւոր գործոն կդարձնի:
