«Հանրապետական» կուսակցության կանոնադրության փոփոխության արդյունքում կուսակցությունում կստեղծվի ավագների խորհուրդ, որտեղ կընդգրկվեն թոշակառու ՀՀԿ-ականները։ Այս խորհրդում հիմնականում կընդգրկվեն պաշտոնաթող ՀՀԿ-ականները, այն պատգամավորները, որոնք 2017-ից հետո լքելու են խորհրդարանը։ Այստեղ կհանգրվանի նաեւ կուսակցության ակունքներում կանգնած Ռազմիկ Զոհրաբյանը, որը դուրս մնաց ՀՀԿ գործադիր մարմնից։ NEWS.am-ի հետ զրույցում Ռազմիկ Զոհրաբյանն ասաց, որ խորհրդում հավաքված մարդիկ կզբաղվեն նաեւ թոշակառու կուսակցականների սոցիալական հարցերով։
«Ավագների խորհուրդ պիտի ստեղծվի, որը կորդինացնելու է 60-ից բարձր տարիքի մարդկանց, ովքեր չեն պաշտոնավարում, այսինքն՝ համակարգելու է նրանց աշխատանքները։ Մենք ունենք երիտասարդական կազմակերպություն, սպորտի, կանանց խորհուրդ, դա էլ կլինի ավագների խորհուրդ։ Էստեղ միայն կազմակերպչական խնդիրները չեն լինի, այստեղ նաեւ որոշակի սոցիալական հարցեր կլինեն կապված ավագների հետ։ Օրինակ, սոցիալական աջակցության հարցեր, դե որոշ հարցեր պետությունն է լուծում, որոշ հարցեր՝ կուսակցությունը կուսակցականների համար»,-մանրամասնեց ՀՀԿ-ականը։
Ի դեպ տեղեկություններ կան, որ Ռազմիկ Զոհրաբյանն է լինելու է խորհրդի ղեկավարը, սակայն Զոհրաբյանն ասաց՝ դեռ հայտնի չէ։ Ինչ վերաբերում է աջակցությանը, ասաց՝ միայն ֆինանսական մասով չէ։
«Նաեւ դա էլ կլինի, պարտադիր չէ գումարով, այդ տարիքի մարդիկ ունեն աջակցման պահանջ, բայց հիմնականը դա չի լինելու, նույն աշխատանքն են տանելու իրենց հնարավորության չափով, որպեսզի միշտ կուսակցության հետ լինեն»։