ՀՅԴ Շիրակի մարզային կառույցի, մարզպետ Հովսեփ Սիմոնյանի նկատմամբ նշանակված կուսակցության քննությունն ավարտվել է, եզրակացությունն արվել է, թե ինչու էր հոկտեմբերի 2-ի ՏԻՄ ընտրություններում այդքան քիչ քվե եղել Դաշնակցության օգտին: ԱԺ ՀՅԴ խմբակցության ղեկավար Արմեն Ռուստամյանը NEWS.am-ի հետ զրույցում ասաց`եզրակացությունը հրապարակման ենթակա չէ:
Հիշեցնենք, որ հոկտեմբերի 2-ի ՏԻՄ ընտրություններից հետո Արմեն Ռուստամյանը լրագրողների հետ զրույցում ասել էր, որ մարզպետի նկատմամբ ՀՅԴ գերագույն մարմինը քննություն է նշանակել, որից հետո եզրակացություն կանեն:
Մեր հարցին, թե այդ եզրակացությունն ինչով է ավարտվել, առաջիկա խորհրդարանական ընտրություններին պատրա՞ստ է ավելի լավ արդյունք ապահովել Հովսեփ Սիմոնյանը, Ռուստամյանը պատասխանեց.
«Քննարկել ենք, վերլուծել ենք, դրանից եզրակացության ենք եկել եւ դրանով պայմանավորված մեր հետագա անելիքները կհստակեցնենք»:
Արմեն Ռուստամյանը չցանկացավ հրապարակել, թե որ հարցերում է թերացել մարզպետը եւ ՀՅԴ Շիրակի կառույցը:
Մեր հարցին` վարչական լծակնե՞րը պետք է գործի դնի լավ արդյունք ապահովելու համար, պատասխանեց. «Ոչ միայն, մարդն իր հեղինակությամբ, իր մարզի խնդիրները պատկերացնելու եւ լուծելու կարողությամբ, լավ պետք է աշխատի: Բոլորն են առաջիկայում շատ մեծ քննություն անցկացնելու»:
