Պաշտոնական այցով Վրաստանում գտնվող ՀՀ պաշտպանության նախարար Վիգեն Սարգսյանը դեկտեմբերի 22-ին հանդիպումներ է ունեցել Վրաստանի խորհրդարանի պաշտպանության ու անվտանգության հանձնաժողովի նախագահ Իրակլի Սեսիաշվիլիի եւ Վրաստանի արտաքին գործերի նախարար Միխաիլ Ջանելիձեի հետ: Այս մասինա յսօր՝ դեկտեմբերի 22-ին, NEWS.am-ը տեղեկանում է ՀՀ պաշտպանության նախարարության մամուլի ծառայությունից:
Հանդիպումների ընթացքում քննարկվել են հայ-վրացական բարեկամական հարաբերությունները, տարբեր բնագավառներում համագործակցության ներկա մակարդակն ու զարգացման հեռանկարները, երկկողմ հետաքրքրություն ներկայացնող այլ հարցեր: Անդրադարձ է կատարվել նաեւ տարածաշրջանային անվտանգության ու կայունության պահպանման ու ամրապնդման խնդիրներին: Կողմերը վերահաստատել են Հայաստանի եւ Վրաստանի կառավարությունների միջեւ համագործակցությունը զարգացնելու պատրաստակամությունը: Նույն օրը ՀՀ պաշտպանության նախարարն այցելել է Վիրահայոց թեմի Թբիլիսիի Սուրբ Գեւորգ առաջնորդանիստ Եկեղեցի, հանդիպել է Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի եւ հոգեւոր դասի ներկայացուցիչների հետ:
ՀՀ պաշտպանության նախարարի գլխավորած պատվիրակությունը եղել է նաեւ Վիրահայոց թեմի «Հայարտուն» կրթա-մշակութային եւ երիտասարդության կենտրոնում, հանդիպել է թբիլիսահայ համայնքի անդամների, Սամցխե-Ջավախքի տարածաշրջանի կառույցների ղեկավարների, համայնքային կազմակերպությունների ներկայացուցիչների հետ: Հանդիպման ընթացքում ՀՀ պաշտպանության նախարարն արժեւորել եւ բարձր է գնահատել Հայոց Եկեղեցու դերը հայ ժողովրդի կյանքում ինչպես Հայաստանում ու ՀՀ զինված ուժերում, այնպես էլ Սփյուռքում, խոսել է զինված ուժերում իրականացվող բարեփոխումների, բանակ-հասարակություն կապերի շրջանակում Սփյուռքի տարբեր կառույցների հետ համագործակցության ծրագրերի մասին: Թբիլիսիում ՀՀ պաշտպանության նախարարը հանդիպում է ունեցել նաեւ Վրաստանի քաղաքացիական հասարակության ներկայացուցիչների հետ: