Թուրքիայի խորհրդարանի առաջ հունվարի 9-ին բողոքի ակցիա են կազմակերպել կառավարման նախագահական համակարգի անցման դեմ։
Թուրքական Cumhuriyet-ի փոխանցմամբ՝ Անկարայում Թուրքիայի խորհրդարանի դիմաց բողոքի ակցիա են կազմակերպել հասարակական կազմակերպությունների ներկայացուցինչեն, փաստաբաններ ու բազմաթիվ քաղաքացիներ։ Սակայն ոստիկանությունը նախագահական համակարգի անցման դեմ բողոքի ակցիայի մասնակիցների նկատմամբ բռնություն է կիրառել։
Բողոքի ակցիան ցրելու համար օգտագործվել են արցունքաբեր գազ, պլաստիկ գնդակներ ու ջրցան մեքենաներ։
Բողոքի ակցիայի մասնակիցներից, ընդդիմադիր «Ժողովրդա-հանրապետական» կուսակցության պատգամավոր Այքութ Էրդողդուն ակցիայից հետո լրագրողների հետ զրույցում հայտարարել է, թե շարունակելու են իրենց բողոքն ու երկիրը չեն հանձնելու դավաճաններին։
Նշենք, որ Թուրքիայի խորհրդարանի օրակարգ է բերվել սահմանադրական փոփոխությունների նոր փաթեթը, որը նախատեսում է անցում կառավարման նախագահական համակարգին։
