«Ժառանգություն» կուսակցությունում կան տարաձայնություններ եւ «Ժառանգությունը» շատ կարեւոր փորձաշրջանի մեջ է: Այս մասին այսօր` հունվարի 16-ին, լրագրողների հետ զրույցում ասաց «Ժառանգության» առաջնորդ Րաֆֆի Հովհաննիսյանը:
«Մենք արդեն 10 տարի թե սպասարկել ենք ընտրական պայքարը, թե եղել ենք քաղաքացիական հատվածի հետ, շարքային քաղաքացիների հետ: Ով կարծում է,թե ինքը կկարողանա հաղթահարել «Ժառանգության» նախադեպն առանց նույն արժեքները որդեգրելու, կսխալվի: «Ժառանգություն» կուսակցությունը ստեղծվել է ժողովրդի ծոցից, երբ ոչ ոք չէր հավատում, որ Հայաստանը կարող է ունենալ ընդդիմադիր քաղաքացիական կուսակցություն: Մենք միշտ բաց ենք խոսել, միշտ եղել ենք ճակատի վրա` Մարտի 1-ին եւ ընտրությունների ժամանակ»,-ասաց նա:
Րաֆֆի Հովհաննիսյանը նշեց, որ «Ժառանգությունում» Մարտի 1-ի վերաբերյալ տարբեր կարծիքներ կան, սակայն, չի կարելի ասել, որ կուսակցությունում հակասություններ են: «Ամեն մեկն ունի իր տեսակետը եւ, ցավոք սրտի, մարտի մեկին ես Պետերբուգում էի որպես դիտորդ եւ կարող եք ինձ համարել մեղսակից, որ ներկա չէի: Մեղսակից էին բոլորը` զինված ուժերը, բոլոր նախագահները, ովքեր կրակ բացեցին անմեղ քաղաքացիների եւ նաեւ ոստիկանների նկատմամբ:
Տարիներ անց թող ոչ ոք սրբի կերպարի մեջ չկանգնի եւ աշխարհին չներկայացնի, թե ինքը սրբության սրբոց է եւ ունի վերջին ճշմարտությունը: Եվ Քոչարյանը, եւ Սերժ Սարգսյանը մարտի մեկով պետք է դատաքննվեն, այդ գործի շրջանակում մինչեւ հիմա չեն դատաքննվել առաջին նախագահը, նրանք, որոնք ներկա եղել են մարտի մեկին որպես տուժող»,-ասաց նա:
Նրա խոսքով` այժմ էականը նոր, սահմանադրական, իշխանափոխված, ինքիշխան Հայաստան ստեղծելն է:
«Զարուհի Փոստանջյանի ասածը միայն այն է, որ նրանք, որոնք մեղավորություն ունեն, հավասարապես պատասխան տան դատարանի առաջ, բայց ներկա դրությամբ մեղսակից չի կարող լինել, քանի դեռ դատավարություն չի եղել»,-ասաց Րաֆֆի Հովհաննիսյանը:
«Ժառանգության» առաջնորդը նշեց` սխալական են բոլորը, այդ թվում ինքը. «Հենց իր սխալի պատճառով 2012 թ. «Ժառանգությունից» պատգամավոր չդարձան Արմեն Մարտիրոսյանը, Ստեփան Սաֆարյանն ու Անահիտ Բախշյանը»: