Հրազդանում ծնողների աչքի առջեւ 7-ամյա որդուն մահացու վրաերթի ենթարկած վարորդին դանակահարելու մեջ մեղադրվող Գագիկ Խանփերյանը կալանքի տակ է, քանի որ ընտանիքը չի կարողացել վճարել գրավը: Այս մասին NEWS.am-ին ասաց նախաքննության ընթացքում Խանփերյանի շահերի պաշտպան Անուշ Մխիթարյանը:
Անուշ Մխիթարյանի խոսքով, գործն արդեն դատարանում է, այստեղ նրա շահերը պաշտպանելու է Գարեգին Մարգարյանը: Հաջորդ դատական նիստը նշանակված է հունվարի 27-ին:
«Ես այդ օրն առաջին անգամ եմ նիստին մասնակցելու, այդ ընթացքում էլ կխոսեմ Խանփերյանի հետ` հասկանալու համար նրա դիրքորոշումը»,- ասաց Գարեգին Մարգարյանը:
Նշենք, որ 7-ամյա տղային ալկոհոլի ազդեցության տակ մահացու վրաերթի ենթարկած վարորդն ազատության մեջ էր, նախօրեին նա դատապարտվել է 3 տարվա ազատազրկման եւ դատարանի դահլիճից տեղափոխվել կալանավայր:
Հիշեցնենք, որ վարորդին դանակահարել էր մահացած երեխայի հայրը, որին սպառնում է մինչեւ 7 տարվա ազատազրկում: Ըստ մեղադրական եզրակացության՝ մահացած երեխայի հայրը՝ Գագիկ Խանփերյանը, 2016թ. սեպտեմբերի 5-ին ժամը 17:30-ի սահմաններում Հրազդանում հանդիպել է իր որդուն վրաերթի ենթարկելու հետևանքով անզգուշությամբ մահ պատճառած Վանիկ Սարգսյանին: Վրեժխնդրության շարժառիթով իր մոտ պահվող դանակով Խանփերյանը դիտավորությամբ հարվածներ է հասցրել Վանիկ Սարգսյանին` պատճառելով ձախ այտի և պարանոցի ձախ կեսի կտրած-ծակած երկու վերքեր, կրծքավանդակի աջ և ձախ կեսի կտրած-ծակած, թափանցող երկու վերքեր, ինչի հետևանքով Սարգսյանի առողջությանը պատճառել է ծանր վնաս:
Գագիկ Խանփերյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով, այն է՝ իտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը: