Գուրգեն Արսենյանի որդու` Գուրգեն Արսենյանի եւ ընկերների գործով դատական քննությունը կանցկացվի արագացված կարգով: Այսօր՝ հունվարի 19-ին, նման որոշում կայացրեց Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը:
Արագացված կարգով քննություն անցկացնելու միջնորդություն նախորդ նիստին ներկայացրել էին ամբաստանյալները: Այսօր մեղադրող կողմը նույնպես փոխեց դիրքորոշումը եւ համաձայնվեց արագացված կարգով դատաքննությունն անցկացնելուն:
Այնուհետեւ դատախազը միջնորդեց որպես տուժող ճանաչել այս գործով նախկինում մեղադրյալ երկու երիտասարդի: Միջնորդությունը բավարարվեց:
Դատական նիստը շարունակվում է: Ամբաստանյալները հայտարարեցին կրկին, որ իրենց մեղավոր են ճանաչում: Գուրգեն Արսենյանն էլ ավելացրեց, որ տուժողների հետ հաշտվել է ինքը: Դատարանը Նշենք, որ նիստին մասնակցում է նաեւ պատգամավոր Գուրգեն Արսենյանը:
Ըստ մեղադրական եզրակացության` պատգամավորի որդին՝ Գուրգեն Արսենյանը, ընկերների՝ Արմեն Ներսիսյանի, Գուրգեն Գրիգորյանի եւ գործով ինքնությունը չպարզված այլ անձանց հետ ապրիլի 17-ին Երեւանի գիշերային ակումբներից մեկի դիմաց, կոպիտ կերպով խախտել է հասարակական կարգը ու բացահայտ անհարգալից վերաբերմունք դրսեւորել հասարակության նկատմամբ, խմբի կազմում, որպես զենք օգտագործվող առարկայի գործադրմամբ կատարել է խուլիգանություն:
Արմեն Ներսիսյանին մեղադրանք է առաջադրվել նաեւ մեկ այլ դրվագով, նա 2015թ. հունիսի 21-ին իր ընկեր Գուրգեն Արսենյանի եւ վերջինիս 3 այլ` գործով ինքնությունները չպարզված ընկերների հետ գտնվել է մայրաքաղաքի ակումբներից մեկում, որտեղ գինովցած լինելու պատճառով աղմկել է, ինչի պատճառով նրան դիտողություն է արել նշված ակումբի տնօրեն Գեւորգ Պողոսյանը: Արմեն Ներսիսյանը սկսել է սեռական բնույթի հայհոյանքներ է տալ եւ անկանոն հարվածներ հասցրել ինչպես Գեւորգ Պողոսյանին, այնպես էլ ցանկացած պատահած անձի` էականորեն խաթարելով հասարակական վայրում գտնվող անձանց ֆիզիկական եւ հոգեկան անձեռնմխելիությունը:
Գուրգեն Արսենյանին մեղադրանք է առաջադրվել Քրեական օրենսգրքի 258-րդ հոդվածի 4-րդ մասով, Գուրգեն Գրիգորյանին՝ 258-րդ հոդվածի 3-րդ մասի 1-ին կետով, իսկ Արմեն Ներսիսյանին 258-րդ հոդվածի 4-րդ մասով 3-րդ մասի 1-ին կետով: Պատգամավորի որդին ստորագրությամբ ազատ է արձակվել, իսկ մյուս երկուսը կալանավորված են:
Ավելի վաղ հայտնել էինք, որ 2016թ. ապրիլի 17-ին մայրաքաղաքի գիշերային ակումբներից մեկում վիճաբանությունը սկսվել է կենցաղային շարժառիթով՝ երկու երիտասարդների միջեւ, որին հետագայում միացել են նաեւ նրանց ընկերները եւ հարաբերությունների պարզաբանումը շարունակվել է դրսում՝ ակումբի մոտ՝ վերաճելով խուլիգանության։ Մայիսի 16-ի դրությամբ՝ քրեական գործով ձեռք բերված ապացույցների հիման վրա որպես մեղադրյալ է ներգրավվել 5 անձ, այդ թվում Գուրգեն Արսենյանին:
Նշենք, որ պատգամավորի որդին ձերբակալվել էր 2016թ. մայիսի 11-ին ոստիկանության աշխատակիցների կողմից «Բագրատաշեն» սահմանային անցակետում եւ ներկայացվել վարույթն իրականացնող մարմնին: Նրան մայիսի 14-ին մեղադրանք էր առաջադրվել եւ խափանման միջոց էր ընտրվել կալանավորումը, սակայն ավելի ուշ խափանման միջոցը փոխվել էր` ստորագրություն չհեռանալու մասին:
