Դանիայի իշխող կոալիցիայի անդամ Liberal Alliance կուսակցությունը նահանջել է Հայոց ցեղասպանությունը ճանաչելու մտադրությունից, փոխանցում է Danmarks Radio-ն:
Ամռանը LA-ն՝ 2 այլ կուսակցությունների հետ իշխանությանը կոչ էր արել Հայոց ցեղասպանությունը պաշտոնապես ճանաչել: Նրանք հանդես են եկել Կարմիր-Կանաչ դաշինքի եւ «Այլընտրանք» կուսակցության հետ:
Սակայն 2016-ի նոյեմբերի վերջին LA-ն մտել է իշխանական կոալիցիայի մեջ եւ շրջադարձ կատարել: Կուսակցության պաշտոնական ներկայացուցիչ Խենրիկ Դալը հայտարարել է, որ պաշտոնական ճանաչման ձգտելու կարիք չկա:
«Մենք պատմաբաններ չենք եւ կարծում ենք, որ հարցը պետք է մասնագետները քննեն: Մեր դիրքորոշումն այսպիսին է»,- Kristeligt Dagblad-ի հետ հարցազրույցում հայտարարել է նա:
Ընդդիմադիր Կարմիր-Կանաչ դաշինքը հավատարիմ է մնացել իր խոսքին: Կուսակցության ներկայացուցիչ Նիկոլայ Վիլումսենը հարցը ցավագին է համարում եւ խորը ողբերգություն:
«Մենք Թուրքիայում փոքրամասնությունների՝ քրդերի եւ քրիստոնյաների, այդ թվում՝ հայերի դեմ ուժեղ քաղաքական ճնշում ենք տեսնում: Այդ պատճառով անհրաժեշտ է, որ դանիական կողմը այդ ուժերին աջակցի»,- հայտարարել է նա:
Դանիայի նոր կառավարությունը այլ վերաբերմունք ունի, քան այնպիսի երկրները, ինչպիսին են՝ Շվեդիան, Գերմանիան կամ Ֆրանսիան, որոնք նախկինում Հայոց ցեղասպանությունը պաշտոնապես ճանաչել են, նշել է Danmarks Radio-ն:
ԱԳ նախարար Անդերս Սամուելսենը (LA կուսակցություն) հինգշաբթի այս հարցով խորհրդակցություն է հրավիրել: