Մարդու իրավունքների եվրոպական դատարանում «Զինված խմբի» գործով մեղադրյալ, Պաշտպանության նախկին փոխնախարար Վահան Շիրխանյանի շահերը պաշտպանող Կարինա Մոսկալենկոյին թույլ չեն տալիս տեսակցել իր պաշտպանյալի հետ:
Այսօր` հունվարի 20-ին, դատական նիստից հետո լրագրողների հետ զրույցում փաստաբանը նշեց, որ ինքը հատուկ Ստրասբուրգից Երեւան է եկել` Շիրխանյանի առողջական վիճակին ծանոթանալու համար:
«Առավոտից ես քրեակատարողական հիմնարկում եմ, սակայն ինձ թույլ չտվեցին տեսակցել նրան: Սկզբում ինձ պատճառաբանեցին, թե վստահ չեն, որ ես փաստաբան եմ, ներկայացրել եմ համապատասխան փաստաթղթերը, այնուհետեւ ասացին, թե Շիրխանյանը հնարավոր է` չի ցանկանում, որ իր հետ հանդիպեմ, ներկայացրել եմ Շիրխանյանի դիմումը, սակայն այդպես էլ թույլ չտվեցին ներս մտնել»,- ասաց փաստաբանը:
Մոսկալենկոն նշեց` ինքը հույս ուներ, որ դատարանում կհանդիպի Շիրխանյանին, սակայն ինչպես պարզվեց, նրան դատարան չեն տեղափոխել: Փաստաբանի խոսքով, Շիրխանյանի հետ կատարվածն ապօրինի է. եթե իրեն թույլ չտան տեսակցել Շիրխանյանին, կդիմի ՄԻԵԴ այդ հարցով:
Նշենք, որ գանգատը վերաբերում է Վահան Շիրխանյանի առողջական վիճակին ու կալանավորմանը:
Հիշեցնենք, որ Վահան Շիրխանյանը կալանավորվել է 2015թ. դեկտեմբերի 21-ին «զինված խմբի» գործով։ Նա մեղադրվում է խմբի պարագլուխ Արթուր Վարդանյանի հետ հանցավոր համագործակցության մեջ, կոնկրետ հանձնառություն եւ դերակատարություն ունենալու մեջ: Շիրխանյանի փաստաբան Հայկ Ալումյանի խոսքով, իր պաշտպանյալի վիճակը շատ ծանր է, նա գտնվում է անմարդկային պայմաններում եւ համապատասխան բուժօգնություն չի ստանում: