«Ճարտարապետական գործունեության մասին» օրենքի նախագծի ընդունմամբ ճարտարապետը պարտավորություն կվերցնի իր անելիքների համար: Այս մասին այսօր՝ հունվարի 23-ին, լրագրողների հետ հանդիպմանը նշեց Ճարտարապետների միության վարչության անդամ Սաշուր Քալաշյանը:
«Հայաստանը վերջին երկիրն է, որ ճարտարապետության ոլորտում դեռեւս խորհրդային համակարգի օրենքներով է շարժվում, մինչդեռ քաղաքակիրթ բոլոր երկրներում դաշտը ամբողջովին այլ ձեւ է կարգավորվում: Այս օրենքի նախագիծը կարգավորում է ճարտարապետի իրավասությունների ու անկախության հարցը՝ պատվիրատուից, տեղական ինքնակառավարման մարմինների կամայականություններից, նաեւ ճարտարապետը պարտավորություն է վերցնում իր անելիքների համար»,-ասաց նա:
Հիշեցնենք, որ 2016 թվականի դեկտեմբերի 1-ին Կառավարությունը հավանություն է տվել «Ճարտարապետական գործունեության մասին» օրենքի նախագծին, որի ընդունմամբ կստեղծվի Հայաստանի ճարտարապետների պալատը:
