«ՎիմպելԿոմ» ու «Beeline Հայաստան»–ի կազմակերպած ու Երեւանում անցնող Eurasia Mobile Challenge նորարությունների միջազգային մրցույթի տարածաշրջանային եզրափակիչ փուլի շրջանակում, NEWS.am -ի թղթակիցը մի քանի թիմերից հետաքրքրվել է նրանց ներկայացրած նախագծերի մասին։ (ֆոտոռեպորտաժ)
Հայաստանը ներկայացնող Terreva թիմը ներկայացրել էր հարմար գործիք բույսերը ճանաչելու համար: Միավորելով տեսողական ճանաչման տեխնոլոգիաների նորագույն հետազոտությունները բուսաբանական փորձաքննության հետ, մշակողները ստեղծել են բջջային հավելված, որը կօգնի բույսերը պահպանել առողջ ու վառ վիճակում՝ առաջարկվող տեղեկությունների ու դրանց խնամքի մասին գործնական խորհուրդների շնորհիվ։
Վրաստանը ներկայացնող երիտասարդները, որոնք մտահոգված են մոլորակում կանաչ տարածքների սրընթաց անհետացումով, ստեղծել էին նոր մարկետինգային գործիք, որի նպատակն է փոխել այս իրավիճակը։ Միակ բանը, որ պահանջվում է Ձեզնից՝ գնել Treepex լոգոտիպով ապրանք, ներբեռնել բջջային հավելվածն ու սկանավորել QR կոդը։ Եվ այդ գնումը կհավելվի Treepex համակարգին, ու մեր մոլորակի վրա ինչ-որ տեղ կհայտնվի ծառ, որը կկոչվի գնորդի անունով։ Հենց ծառը տնկվի՝ հաճախորդը հավելվածով ու էլփոստով ծանուցում կստանա ՝ այդ թվում անհատական ծառի լուսանկարը ու դրա GPS կոորդինատները ։ Տնկված ծառը ու դրա տիրոջ անունը հնարավոր կլինի գտնել Treepex քարտեզի վրա։
Ուկրաինայի թիմը առաջարկում է Photofact ծառայությունը, որը բաղկացած է բջջային հավելվածից ու ամպային պլատֆորմից, որը լուսանկարները կոնվերտացնում է կեղծիքից պաշտպանված փաստաթղթի։ Նրանց հայրենակիցները մշակել են inCust-ը՝բիզնեսի համար անքարտ ծրագիր՝ «բանալու նման»։ Այն ունի մի քանի գործառույթ ՝ պլաստիկի փոխարեն հեռախոսահամարի գործածումը, հաճախորդի համար միասնական կոմունիկացիոն տարածքի մուտքի հնարավորություն, վայրկենական գործարկում նույնիսկ սմարթֆոնի վրա։
Ռուսաստանի Smart Parking թիմի ներկայացուցիչները պատմեցին իրենց հավելվածի մասին, որը օգնում է ոչ միայն հեշտ ու արագ գտնել մեքենան կայանելու տեղ, այլեւ թույլ է տալիս վճարումն իրականացնել հենց հեռախոսից։ Առայժմ նրանք սահմանափակվում են Ռուսաստանի շուկայով, սակայն ապագայում մտադիր են ընդլայնվել։
Donate-Asia.org ստարտապը իրենից ներկայացնում է դրամահավաքի քրաուդֆանդինգային հարթակ ՝ գերազանցաբար կարիքավորներին օգնելու նպատակով։ Նախաձեռնողները շեշտում են, որ չնայած ծրագիրն օգտագործում են բացառապես ոչ կոմերցիոն կազմակերպությունները, կան նաեւ անկախ արտիստներ, արտադրողներ, քաղաքական ընկերություններ, ստարտապներ ու նույնիսկ գիտական հետազոտողներ։
Մինչդեռ Ղազախստանի AgroShield թիմը մշակել էր սեփական մետեոկայանը ու առաջարկում էր ծրագրային ապահովում, որը կոչված է հեշտացնել գյուղատնտեսական աշխատողների կյանքը։ Օրինակ կախված տարածաշրջանից, տարվա եղանակից ու եղանակային պայմաններից՝ օգտատերը կարող է իմանալ պտղատու ծառերի պատվաստման ճշգրիտ ժամկետը ու դրանով իսկ խուսափել կրկնակի պատվաստման անհրաժեշտությունից։
Ուզբեկստանը ներկայացնող թիմի MyApteka հավելվածը առաջարկում է հարմար գործիք ձեզ հետաքրքրող ցանկացած դեղի, դրա հակացուցումների ու կիրառման ցուցումների մասին տեղեկություն որոնելու համար։
Հիշեցնենք, որ անցած լոկալ փուլերի արդյունքներով՝ եզրափակիչ են դուրս եկել 8 երկրների 24 թիմեր՝ Ռուսաստանի, Հայաստանի, Վրաստանի, Ղազախստանի, Ղրղզստանի, Տաջիկստանի, Ուկրաինայի ու Ուզբեկստանի։ Հայաստանը ներկայացնում են Earlyone, Terreva, Certifire թիմերը։
Հաղթող թիմերին հրավիրելու են Բարսելոնա՝ Համաշխարհային Մոբիլ կոնգրեսին, որը կայանալու է 2017-ի փետրվարին։ Բացի դրանից նրանք կստանան USD $20,000, USD $15,000, USD $10,000-ի չափով դրամական պարգեւներ՝ համապատասխանաբար 1-ին, 2-րդ ու 3-րդ տեղերի համար