Թուրքիայում գտնվող Գերմանիայի կանցլեր Անգելա Մերկելի ու քրդական «Ժողովուրդների դեմոկրատական» (HDP) կուսակցության պատվիրակության միջեւ հանդիպումից մանրամասներ են հայտնի դարձել։
Թուրքական Demokrathaber կայքի փոխանցմամբ՝ Անկարայում Գերմանիայի դեսպանության շենքում տեղի ունեցած հանդիպման ժամանակ քուրդ պատգամավորները Անգելա Մերկելին ներկայացրել են Թուրքիայում տիրող իրավիճակը, պատմել HDP–ի դեմ իրականացվող ճնշումների մասին։
Օրեր առաջ բանտից ազատված քուրդ պատգամավոր Իդրիս Բալուքենն էլ նշել է, թե միայն այն, որ իրենց կուսակցության նախագահներն ու կուսակցության հարյուրավոր անդամներ անօրինական կերպով գտնվում են բանտերում, դա արդեն լուրջ անհանգստանալու առիթ է։
Քուրդ պատգամավորները, անդրադառնալով Եվրոպայում փախստականների հետ կապված խնդրին, շեշտել են, թե կարճաժամկետ քաղաքականությունն այդ հարցում օգուտ չի տա։ Նրանք նշել են, որ տարածաշրջանում խաղաղության հաստատումը կլուծի փախստականների հարցը։
