ԱՄՆ առաջին տիկին Մելանյա Թրամփի փաստաբանները կրկին դատական հայց են ներկայացրել Daily Mail պարբերականի դեմ՝ էսկորտ-ծառայությունների ոլորտում նրա աշխատանքի մասին հաղորդագրությունների համար: Այս մասին գրում է ՌԻԱ Նովոսին՝ վկայակոչելով Hill-ը:
Թրամփի փաստաբաններն անցյալ տարվա օգոստոսին նույնպես հայց էին ներկայացրել ամերիկյան Մերիլենդ նահանգի դատարան՝ լրագրողներին մեղադրելով, որ կեղծ հաղորդագրություններ են տարածում 1990-ականներին Մելանյայի կողմից էսկորտ-ծառայություններ մատուցելու մասին, եւ նրա համբավին հասցված վնասը 150 մլն դոլար գնահատել:
Ավելի ուշ բրիտանական պարբերականը հետ էր կանչել Թրամփի կնոջ մասին նյութը, իսկ Մերիլենդի դատարանն անցյալ շաբաթ դադարեցրել էր գործը՝ պարզաբանելով, որ նահանգի դատարանն անհրաժեշտ իրավասություն չունի Մեծ Բրիտանիայի պարբերականի դեմ դատական հայց քննելու համար:
Հիմա Մելանյայի փաստաբանները նույն պահանջով դիմել են Նյու Յորք նահանգի դատարան՝ 150 մլն դոլարի չափով բարոյական վնասի փոխհատուցում պահանջելով:
