ՀՀ վարչապետ Կարեն Կարապետյանի զգուշացումը՝ վարչական լծակները քարոզչական նպատակներով չօգտագործելու մասին, ուղղված չէր Ֆինանսների նախարարությանը: Այս մասին այսօր՝ փետրվարի 9-ին, կատավարության նիստից հետո լրագրողների հետ զրույցում նշել է ՀՀ Ֆինանսների նախարար Վարդան Արամյանը:
«Ոչ մի քանով դա ինձ չի վերաբերում: Դրա մասին պետք է հարցնեք պարոն Կարապետյանին: Ես կարծում եմ, որ դա ուղղակի հորդոր էր, որպեսզի նախապես, քանի որ թեւակոխելու ենք նախընտրական ժամանակահատված, որպեսզի չլինեն անհարկի չարաշահումներ, որ ինչ-որ մեկը փորձի դա օգտագործել եւ ի վնաս լինի, ոչ թե ի նպաստ որեւէ կուսակցության, որովհետեւ արգելվում է վարչական ռեսուրսներն օգտագործել նման նպատակի համար: Դրա համար նախապես հորդոր եղավ՝ նման բաներով չզբաղվել: Ես վստահ եմ, որ դա ֆինանսների նախարարությանը չէր ուղղված»,-ասաց նախարարը:
Նա նշեց, որ իրենք ֆինանսների նախարարության աշխատողներին չեն հորդորում քվեարկել այս կամ այն կուսակցության օգտին:
Ավելի վաղ NEWS.am-ը հայտնել էր, որ Կառավարության այսօրվա նիստում, մինչ հանձնարարականներին և օրակարգին անցնելը, վարչապետ Կարեն Կարապետյանը, դիմելով գերատեսչությունների ղեկավարներին, ասել էր, որ անթույլատրելի է ադմինիստրատիվ ռեսուրսներն օգտագործել քարոզչության համար:
«Մամուլում կան հրապարակումներ, որ մեր գերատեսչությունների ղեկավարները, մարզային կառույցների ղեկավարները իրենց ադմինիստրատիվ ռեսուրսներն օգտագործում են քարոզչության համար: Մտնում ենք նախընտրական փուլ: Բոլորին խստագույնս զգուշացվում է, որ նման ծառայություններն «արջի ծառայություններ» են լինելու՝ անկախ նրանից, թե որ կուսակցության շահն են իրենք պահում: Հատուկ ուշադրություն դարձնել այդ բանին», – նշել էր նա:
