«Համախմբում» կուսակցության առաջնորդ Վարդան Օսկանյանն այսօր լրագրողների հետ զրույցում դժվարացել է ասել, թե ինչ տեսք կունենա իր եւ պաշտպանության նախկին նախարար Սեյրան Օհանյանի դաշինքը:
«Քաղաքական ուժերը երբ վերջնական որոշում կայացնեն դաշինքում լինելու, դրանից հետո կնայենք՝ ում թեկնածությունն է ներկայացվելու, վստահ եմ, որ բավական հաջող ցուցակ կկարողանանք կազմել»,-ասել է Օսկանյանը:
Ինչ վերաբերում է դաշինքում առկա տարակարծություններին, Օսկանյանն ասել է. «Միշտ էլ տարակարծություններ կարող են լինել, տարբեր առաջարկներ, բայց կարծում եմ՝ վերջիվերջո կգանք այդ համաձայնության»:
Օսկանյանը նշել է, որ Գագիկ Ծառուկյանի հետ միավորվելու հետեւողական քննարկումներ չկան:
«Միայն դաշիքներով գնալու հարց չի, հետընտրական շրջանում էլ քաղաքական գործընթացներ են լինելու, կախված ընտրության արդյունքներից քաղաքական կոալիցիաներ կարող են լինել»:
Նախկին արտգործնախարարը անդրադարձել է նաեւ իրենց դաշինքին միացած ԱԻՄ առաջնորդ Պարույր Հայրիկյանի այն հայտարարությանը, որ հնարավոր է նա լքի դաշինքը:
«Ամեն մեկն իր քաղաքական խնդիրներն է դնելու, եւ քաղաքական ուժերը նաեւ ելնելով ցուցակի կազմից՝ վերջնական որոշում կկայացնեն՝ մնա՞լ դաշինքում, թե՞ չմնալ: Եկող մի քանի օրվա ընթացքում ամեն ինչ պարզ կլինի: Այս պահին դժվար է ասել՝ ինչպիսի վերջնական տեսք կունենա դաշինքը»:
Նա ասել է, որ «Ժառանգություն» կուսակցության հետ քննարկումները շարունակվում են: