Լոս Անջելեսի քաղաքային խորհրդի անդամ Փոլ Կրեկորյանը պաշտոնապես ներկայացրել է Հայոց ցեղասպանության 100-ամյակին նվիրված հուշատախտակը: Բացման արարողությունը տեղի է ունեցել փետրվարի 13-ին՝ Լոս Անջելեսի քաղաքապետարանում: Այս մասին հայտնում է Asbarez-ը:
2015-ի ապրիլին Լոս Անջելեսի քաղաքային խորհուրդը աջակցել է ի հիշատակ Հայոց ցեղասպանության ծառատնկման նախագծին: Քաղաքային խորհրդի անդամ Փոլ Կրեկորյանի առաջարկած նախագիծը նախատեսում էր ամբողջ քաղաքում՝ այգիներում նռան 100 ծառի տնկում:
«Նուռը հայ մշակույթի ամենաճանաչված խորհրդանիշներից մեկն է: Հայոց ցեղասպանության կապակցությամբ նուռը դարձել է հույսի, վերածնման եւ ազգի վերապրելու խորհրդանիշ»,- հայտարարել է Փոլ Կրեկորյանը:
Նրա խոսքով՝ այս քայլով Լոս Անջելեսը համերաշխություն է հայտնել եւ ցույց տվել, որ Հայոց ցեղասպանության ճանաչման հարցում կանգնած է արդարության կողմում:
Հուշատախտակի վրա գրված է. «Լոս Անջելեսը հիշում է Հայոց ցեղասպանության 100-ամյակը՝ 1915-2015: Այս ծառը տնկել են քաղաքապետ Էրիկ Գարցետին եւ խորհրդի անդամ Փոլ Կկրեկորյանը»:
