ՀՀԿ տարածքային ցուցակում ընդգրկված անձանց գնահատականը կտա հանրությունը: Այդ մասին այսօր՝ փետրվարի 18-ին ԵԿՄ համագումարից առաջ լրագրողների հետ զրույցում ասել է ԱԺ ՀՀԿ խմբակցության ղեկավար Վահրամ Բաղդասարյանը:
Խոսելով ՀՀԿ համամասնական ցուցակի մասին՝ նա ասել է. «Բավական տրամաբանական ցուցակ է, եւ արդյունքների մասին կխոսենք ապրիլի 3-ին»:
Իսկ դիտարկմանը, թե տարածքային ցուցակներում հին եւ մականունավոր դեմքերն են, պատասխանել է. «Դա մեր թիմն է եւ մեր որոշումները կայացնելու ենք այդ ձեւով: Բավական քաղաքական ցուցակ ենք համարում մեր համամասնական ցուցակը, իսկ ռեյտինգային ցուցակի գնահատականները կտա հանրությունը»:
Լրագրողները նաեւ հիշեցրին պաշտպանության նախկին նախարար Սեյրան Օհանյանի հայտարարությունը, թե Հայաստանում քաղբանտարկյալներ կան: «Եթե այդ հայտարարությունը լիներ իր իշխանության տարիներին, ես տրամաբանություն կտեսնեի այդտեղ: Բայց այդ տարիներին երբեւիցե նման հայտարարություն չեմ լսել: Ի՞նչ է նշանակում, որեւէ քաղաքական ուժի ներկայացուցիչ այլեւս իշխանության մեջ չէ, արդեն հայտնվո՞ւմ են քաղբանտարկյալներ: Ես տրամաբանական չեմ համարում»,- նշել է Բաղդասարյանը:
Սեյրան Օհանյանը նաեւ հայտարարել էր, թե իր դեմ արշավ է սկսվել: Ըստ Բաղդասարյանի, ՀՀԿ-ն նման բան չի անում: «Մենք ձեռնպահ ենք մնում նման երեւույթներից»,- ասաց խմբակցության ղեկավարը: