Հայկական արտադրության 360 աստիճան կարճամետրաժ ուսուցողական ֆիլմերը կցուցադրվեն միջազգային շուկայում, արդեն լիցենզիա ստանալու ուղղությամբ աշխատանքներ են տարվում: NEWS.am-ի հետ զրույցում այս մասին հայտնեց «Technology and Science Dynamics»-ից Գոռ Ռուստամյանը:
«Մենք բավական երկար ժամանակ ենք զբաղվում 360 աստիճանի ձեւաչափով ֆիլմերի ստեղծմամբ՝ տարբեր կրթական ծրագրերի համար: Նախագծում մեծ թիմ է ներառված՝ անիմատորներ, դիզայներներ, մանկական հոգեբաններ եւ մանկավարժներ»,- նշեց Գոռ Ռուստամյանը:
Փետրվարի 18-ին Եղվարդում կայացել է կրթական ֆիլմերի պրեմիերան: Ներկայացված երեք ֆիլմերից մեկն առաջարկում է քայլ առ քայլ ուսումնասիրել է աստղային երկնքի մասին մարդու պատկերացումները՝ հնագույն ժամանակներից մինչ այսօր: Երկրորդ ֆիլմը նվիրված է վարակներին, դրանք բնույթին, դրանց դեմ մարդու օրգանիզմի պայքարին: Երրորդ ժապավենը նախատեսված է ավելի փոքր տարիքի երեխաների համար եւ մատչելի լեզվով աստղագիտության մասին տարրական գիտելիքներ է տալիս:
Ֆիլմերը երեք լեզուներով են՝ հայերեն, ռուսերեն եւ անգլերեն: Մեկ ժապավենի նկարահանումը շուրջ երեք ամիս է տեւում: Տեւողությունը՝ 10-15 րոպե, հաշվարկված է այնպես, որպեսզի հանդիսատեսը չհոգնի:
Նկարահանումից հետո մինչեւ պաշտոնական պրեմիերան ֆիլմը փորձնական ցուցադրում են, արձագանքներ ստանում եւ անհրաժեշտ շտկումներ կատարում: Ներկայում ֆիլմերի թեմաներն են ֆիզիկան, քիմիան, կենսաբանությունը, աստղագիտությունը: Սակայն նախատեսվում է ներառել նաեւ հումանիտար գիտությունն ու մշակույթը:
