Եվրոպայի վերնախավի ու նոր ամերիկյան աշխատակազմի անցած շաբաթվա առաջին հանդիպումների սցենարը լավ պատրաստված էր ու մասնակիցները սիրալիր էին, սակայն Մյունխենում անվտանգության հարցերով համաժողովի ժամանակ մի քանի անհարմար պահեր այնուամենայնիվ եղան, գրել է Politico–ն։

«Այնպիսի տպավորություն էր, ասես ամերիկացիների ու եվրոպացիների համար դա առաջին ժամադրությունն էր, ընդ որում ինչ-որ մեկի միջնորդությամբ կազմակերպված»,- գրում են հեղինակները։

Նրանց կածիքով Եվրոպա ժամանած ամերիկացի չինովնիկները, այդ թվում փոխնախագահ Մայք Փենսը, պաշտպանության քարտուղար Ջեյմս Մաթթիսը ու ազգային անվտանգության քարտուղար Ջոն Քելին գիտեին, թե ինչ են իրենցից ակնկալում եվրոպացիները։ Եվրոպական մամուլում անընդհատ հիշատակվում էին «ուժեղ աջակցություն Եվրոպային», «անսասան նվիրվածություն» ՆԱՏՕ-ին արտահայտությունները, սակայն Փենսի խոսքում այդպես էլ չհնչեց «Եվրոպական միություն» արտահայտությունը, ինչը քննարկումների առիթ դարձավ կուլիսների ետեւում։

Հոդվածագիրը նշում է նաեւ ամերիկյան չինովնիկների ու հենց Թրամփի հայտարարությունների միջեւ նկատվող անհամաձայնությունները։ Ասես երկու կառավարությունների հետ գործ ունենք, ասել էր ԵՄ չինովնիկներից մեկը։

ԱՄՆ նախագահի նախկին թեկնածու Ջոն Մաքքեյնը կոչ է ր անում ԱՄՆ-ի մասին դատել գործերով, այլ ոչ թե բառերով։ «Դա նույնպես չի օգնում», ասում են փորձագետները։

Բացի դրանից եվրոպացիներին չի ուրախացրել նաեւ Մաթթիսի վերջնագիրը՝ պաշտպանական ծախսերի ավելացման հարցում։ Փենսը նույնպես կրկնում էր, որ իրենց նախագահը ակնկալում է, որ եվրոպական երկրները ավելի շատ գումար կհատկացնեն պաշտպանական կարիքներին։

Որոշակի լարվածություն, ըստ փորձագետների, զգացվում էր նաեւ Փենսի ու Գերմանիայի կանցլեր Անգելա Մերկելի հանդիպման ժամանակ։ Փենսն անընդհատ հիշատակում էր Թրամփի անունը, իսկ խոսելով ՆԱՏՕ-ի մասին, օգտագործում էր հռետորական արտահայտություններ՝ «ձեր պայքարը նաեւ մեր պայքարն է, ձեր հաջողությունը՝ մեր հաջողությունն է» եւ այլն։ Սակայն կուլիսների ետեւում նորից նկատել էին, որ փոխնախագահն այդպես էլ չէր արտասանել «Եվրոպական միություն» արտահայտությունը՝ դրանով իսկ հաստատելով որոշ մտավախություններ այն մասին, որ Թրամփի աշխատակազմը մտադիր է «ՆԱՏՕ-ից բացի քանդել հետպատերազմական արեւմտյան կարգերի եւս մեկ հենասյուն»։